Chelsea komplew juru l-qawwa tagħhom meta fis-sitt ġurnata tal-Fażi tal-Kampjonat tal-UEFA Conference League, ospitaw lil Shamrock Rovers u għelbuhom bl-iskor ta’ 5-1 biex irreġistraw il-ħames rebħa.
Il-protagonista ta’ dan is-suċċess kien il-player Spanjol ta’ 18-il sena, Marc Guiu (23, 34, 45) li skorja hat-trick, bil-goals l-oħra jaslu minn Kiernan Dewsbury-Hall (40) u Marc Cucurella (58). Il-goal tal-Irlandiżi wasal minn Markus Poom (26).
Guimaraes v Fiorentina – Fiorentina marru l-Portugall u spiċċaw fi draw ta’ 1-1 kontra Guimaraes biex fallew żewġ punti u tilfu l-pass mal-leaders, Chelsea, b’ħames punti. Kien minn Gustavo Silva (33) li fetaħ l-iskor għall-Portugiżi iżda Rolando Mandragora (87) kiseb id-draw għall-Viola.
