Corinthians huma favoriti biex jiffirmaw lill-attakkant ta’ Manchester United, Edinson Cavani, bi free transfer fi tmiem l-istaġun 2021-22.
Il-player ta’ 34 sena se jlesti l-istaġun f’Old Trafford minkejja li huwa marbut b’mod qawwi ma’ tluq f’ Jannar.
Madankollu l-kuntratt tal-attakkant mat-team ta’ Ralf Rangnick se jiskadi fl-aħħar ta’ Ġunju, u mistenni jħalli lill-ġganti Ingliżi fit-tfittxija ta’ club ġdid.
Cavani kien imħasseb bil-wasla ta’ Cristiano Ronaldo fis-sajf li għadda, li hija waħda mir-raġunijiet ewlenin għaliex ikkunsidra li jħalli lil Man United matul is-suq tat-trasferimenti tax-xitwa.
Barcelona m’għadhomx interessati fl-internazzjonali tal-Urugwaj minkejja li x-xahar li għadda kienu marbuta b’mod qawwi mas-servizzi tiegħu.
Corinthians jinsabu favoriti għall-attakkant ta’ esperjenza, iżda qed jingħad ukoll li hemm interess mill-clubs Arġentini River Plate u Boca Juniors.
Cavani ma kienx utilizzat fit-telfa ta’ Man United fl-FA Cup kontra t-team taċ-Championship, Middlesbrough, nhar il-Ġimgħa filgħaxija, wara li ngħata ħin liberu addizzjonali minħabba l-involviment tiegħu mal-Urugwaj matul il-waqfa internazzjonali.
