Il-clubs tal-Premier League Ingliż għażlu li jwettqu l-programm tal-festi minkejja t-tfixkil kontinwu kkawżat minn każijiet ta’ Covid-19.
L-20 club tal-kampjonat iltaqgħu il-bieraħ biex jiddiskutu kif jistgħu jittrattaw l-isfidi li ffaċċjaw wara li sitt partiti ġew posposti minħabba n-numri tal-Covid-19 fi tmiem il-ġimgħa.
Il-posponiment ta’ round ta’ logħob matul il-Milied kien possibbiltà.
Ma saret l-ebda votazzjoni u għalhekk żewġ rounds ta’ fixtures huma fis-seħħ fuq ħamest ijiem mis-26 ta’ Diċembru.
Kien mistenni li l-20 ġimgħa tal-logħob, li tibda fit-28 ta’ Diċembru, tiġi posposta sabiex titnaqqas il-pressjoni fuq l-iskwadri tal-Premier League.
Minflok, il-clubs ġew avżati li jekk għandhom 13-il player tajbin, flimkien ma’ goalkeeper, għandhom jilagħbu.
Madankollu, ir-replays tal-FA Cup fit-tielet u fir-raba’ rounds ġew skrappjati u għadhom għaddejjin taħdidiet dwar jekk il-logħbiet tas-semi-finali tal-League Cup għandhomx jitnaqqsu għal logħba waħda.
Il-ġimgħa li għaddiet, il-players tal-Premier League rritornaw 42 test pożittiv tal-Covid-19 f’perjodu ta’ sebat ijiem, l-ogħla numru mill-bidu tal-pandemija.
Fil-partiti tal-Premier League tal-Ħadd, Chelsea kellhom biss sitt sostituti għad-draw tagħhom ma’ Wolves u Liverpool kisbu d-draw ma’ Tottenham mingħajr numru ta’ ismijiet tal-ewwel team.
Ħamsa mis-sitt partiti tas-Sibt ġew imħassra. Chelsea ppruvaw biex il-partita kontra Wolves tiġi posposta u l-manager Thomas Tuchel qal li l-players tiegħu tpoġġew f’”riskju kbir… mhux biss minħabba l-Covid iżda wkoll fiżikament”.
Huwa mifhum li Liverpool kienu fost grupp ta’ clubs li mbuttaw għall-posponiment tal-20 ġurnata ta’ logħob.
Wara d-draw tal-Ħadd għand Spurs, il-manager ta’ Liverpool, Jurgen Klopp, qal li l-logħob fis-26 u fit-28 ta’ Diċembru ma kienx fattibbli.
“Huwa mpossibbli, m’għandniex players,” qal Klopp. “Irridu naħsbu li se jkollna każ żejjed jew tnejn. Ma nistgħux ninbuttawhom kollha. Is-26 u t-28, dan mhux possibbli. Nippreferu nilagħbu, iżda għandna bżonn l-għajnuna.”
Is-seba’ timijiet tal-Premier League li għadhom fil-League Cup se jiffaċċjaw logħbiet illum u għada u se jilagħbu tliet partiti tal-Premier League bejn il-Ħadd li ġej u t-2 ta’ Jannar.
Intant il-programm tal-kwarti-finali tal-League Cup huwa:
Illum: Arsenal v Sunderland.
Għada: Brentford v Chelsea; Liverpool v Leicester; Tottenham v West Ham.
