Cristiano Ronaldo għamel id-debutt fis-Sawdi Pro League hekk kif il-Ħadd mexxa lil Al-Nassr għal rebħa ta’ 1-0 fuq Ettifaq fl-ewwel partita tiegħu minn mindu sar l-aktar player imħallas fl-istorja tal-football b’pakkett finanzjaru ta’ €400 miljun.
Id-debutt tiegħu kien xhieda ta’ 22,862 partitarju hekk kif ingħata wkoll il-faxxa ta’ captain.
Huwa resaq viċin li jiftaħ l-iskor iżda x-xutt minn barra l-kaxxa ġie mxellef għal corner.
Al-Nassr fetħu l-iskor fil-31 minuta meta l-cross ta’ Abdulmajeed Al Sulaiheem kien immirat lejn Ronaldo iżd Anderson Talisca daħal bħal sajjetta u xeħet fix-xibka bir-ras.
Fit-tieni taqsima, Ronaldo sab il-forma solita tiegħu u flimkien ma’ Talisca u Pity Martinez kienu ta’ theddida kontinwa għad-difiża avversarja.
L-attakkant Portugiż ma rnexxielux jiskorja fid-debutt tiegħu iżda ladarba jissetilja, bla dubju, se jkun il-protagonista tat-team tiegħu u tal-kampjonat in ġenerali.
B’din ir-rebħa, Al-Nassr baqgħu jokkupaw il-quċċata tal-klassifika.
