Cristiano Ronaldo stqarr li telaq ‘il barra minn Old Trafford fir-rebħa ta’ Manchester United fuq Tottenham bl-iskor ta’ 2-0 għax ħassu pprovokat mill-manager Erik ten Hag.
L-attakkant beda l-logħba fuq il-bank tas-sostituti hekk kif it-team ipproduċa waħda mill-aqwa wirjiet taħt l-era ta’ Ten Hag … iżda Ronaldo ma rax il-partita tintemm minħabba li lejn it-tmiem telaq ‘il barra.
Mitlub jispjega l-aġir tiegħu waqt l-intervista kontroversjali, Ronaldo qal li filwaqt li ddispjaċih għal għemilu, ħass li Ten Hag ‘ipprovokah’.
“Se nkun onest, hija xi ħaġa li jiddispjaċini, li tlaqt mill-istadium,” huwa qal. “Wisq probabbli, jew forsi le. Ejja ngħidu li jiddispjaċini.
“Imma ħassejtni pprovokat mill-coach. Ma nħalliex coach isejjaħli f’logħba għall-aħħar tliet minuti.”
Huwa kompla: “Ma tilgħabnix kontra Manchester City minħabba rispett lejn il-karriera tiegħi u trid tilgħabni għal tliet minuti kontra Tottenham? Ma jagħmilx sens. Naħseb li għamilha apposta. Ħassejtni pprovokat mhux biss minħabba dik il-logħba … imma anke qabel.
“Hu ma jirrispettax il-mod kif jimmeritani. Iżda huwa dak li hu. Huwa għalhekk li probabbilment, fil-logħba kontra Tottenham, tlaqt.
“Il-coach ma għandu l-ebda rispett lejja. Għalhekk ir-relazzjoni hija dik li hi. Quddiem il-ġurnalisti jgħid li ġie għandi u jgħid li għandu kull rispett lejja … bla, bla, bla … iżda għamel dan biex jingħoġob .. 100%.
“Jekk ma jkollokx rispett lejja, qatt mhu ser ikolli rispett lejk.”
