Cristiano Ronaldo sostna li ċaħad offerta mill-aktar attraenti mill-Arabja Sawdija għax dak iż-żmien ma kellu l-ebda xewqa li jħalli lil Manchester United.
Ronaldo ġie offrut kuntratt ta’ €350m biex imur jilgħab fl-Arabja Sawdija fis-sajf li għadda iżda huwa rrifjuta din l-offerta minħabba li ried jibqa’ f’Old Trafford fit-tentattiv li jkompli l-forma impressjonanti tiegħu ta’ goals biex jgħin lit-team jisfida għar-rebħ tal-Premier League Ingliż.
Madankollu, huwa kiser kull relazzjoni mal-coach Erik ten Hag fejn stqarr ukoll li ma għandu l-ebda rispett lejh bil-konsegwenza li issa hija ħaġa ċerta li Ronaldo mhux se jilbes aktar il-flokk tar-Red Devils.
Mitlub waqt l-intervista kontroversjali li għamel, huwa kkonferma r-rapporti ta’ offerta mill-Arabja Sawdija, Ronaldo qal: “Iva … huwa veru.
“Minkejja li sezzjoni tal-media rrapportat li l-ebda club ma kien interessat fis-servizzi tiegħi, ġejt avviċinat biex immur nilgħab fil-Golf Għarbi.
“Saritli ħafna ħsara. Peró nistaqsi … kif seta’ ħadd ma riedni meta skorjat 32 goal fl-istaġun li għadda?
“Iżda biex inkun onest, ma ridtx niċċaqlaq minn Old Trafford għax kont kuntent u motivat.
“Għadni nemmen li nista’ niskorja ħafna aktar goals u ngħin lit-team għax għadni nemmen li għadni tajjeb u kapaċi ngħin lit-team nazzjonali u anke lil Manchester United.
“Imma jekk ma tħossx madwarek li l-enerġija fuq in-naħa tiegħek, huwa diffiċli. Naturalment, il-kritika se teżisti l-ħin kollu.”
