Cristiano Ronaldo qed jagħmel it-taħriġ fil-faċilitajiet tal-eks club tiegħu, Real Madrid, erba’ snin wara li ħalla lill-istess Madrileni biex jingħaqad ma’ Juventus.
L-attakkant internazzjonali Portugiż għalissa qed jitħarreġ waħdu fil-faċilità biex iżomm lilu nnifsu fil-forma u f’fiżika tajba wara l-eliminazzjoni ta’ pajjiżu mit-Tazza tad-Dinja.
Bħalissa Ronaldo huwa aġent ħieles wara li b’mod reċiproku temm il-kuntratt tiegħu ma’ Manchester United ix-xahar li għadda wara l-intervista kontroversjali tiegħu ma’ Piers Morgan fuq il-media soċjali.
Ġie rrappurtat li l-player ta’ 37 sena staqsa lill-president ta’ Real Madrid, Florentino Perez jekk jistax jitħarreġ f’Valdebebas għal ftit jiem. Ir-risposta ta’ Perez kienet fl-affermattiv hekk kif wieġbu: “Daż-żgur li tista’ … din hija d-dar tiegħek!”
Ronaldo lagħab għal dan il-club ġgantesk għal tmien snin sħaħ wara li ngħaqad miegħu mingħand Manchester United għal somma rekord ta’ £80 miljun, fl-2009. F’dan il-perjodu, huwa rebaħ kollox.
Huwa baqa’ jżomm relazzjoni ma’ Perez hekk kif dan tal-aħħar qal: “Cristiano Ronaldo qatt ma ħoloq problema f’Madrid. Kien ta’ eżempju kbir u huwa l-aqwa player li ffirmajna. Huwa professjonist u perfezzjonist f’dak kollu li jagħmel.”
Sezzjoni tal-media fi Spanja rrappurtat ukoll li Ronald jista’ jilħaq ftehim mal-Madrileni biex jilgħab magħhom għall-kumplament tal-istaġun hekk kif qed ifittex club.
Nistennew u naraw!
