Minn Cristian Muscat
Kif bdiet l-imħabba tiegħek lejn il-futbol?
Bdejt nilgħab l-ewwel il-futbol mill-bandli f’Birkirkara, fejn konna niltaqgħu wara l-iskola u nagħmlu ħinijiet twal nilagħbu, fejn imbagħad ta’ tmien snin irreġistrajt għall-ewwel darba man-Nursery ta’ Birkirkara FC.
U għaliex għażilt proprju r-rowl ta’ goalkeeper?
Kien ħija li ħajjarni nidħol fil-lasta l-ewwel darba, għall-fatt ukoll li huwa wkoll kien jilgħab bħala goalkeeper u rrnexxielu jnissel fija l-passjoni għal din il-pożizzjoni.
Ħa mmur mal-ewwel għall-punt. Kif qed tħares lejn l-esperjenza ġdida tiegħek ma’ St Andrew’s FC?
St Andrew’s FC huwa klabb organizzat b’set-up professjonali u faċilitajiet mill-aqwa. Meta spicca l-istaġun li għadda u ġejt avviċinat mill-klabb, ma ħsibthiex darbtejn biex niffirma. Din se tkun it-tieni esperjenza tiegħi ma’ St Andrew’s FC fejn proprju magħhom għamilt id-debutt tiegħi mal-iskwadra tal-kbar fl-etá ta’ 15-il sena u ta’ 17-il sena sirt il-goalkeeper numru wieħed tal-klabb. Ħallejt il-klabb fl-etá ta’ 20 sena biex iffirmajt l-ewwel kuntratt professjonali tiegħi ma’ Balzan FC. Dan l-istaġun qed inħares lejh b’ottimiżmu biex flimkien mal-kumplament tal-iskwadra nippruvaw intejbu l-pożizzjoni li kiseb il-klabb fl-aħħar staġuni fiċ-Challenge League.
Kif qed tħarsu lejn l-istaġun li ġej?
Bħala skwadra qed naħdmu flimkien taħ il-gwida tal-kowċ u l-istaff tekniku tiegħu biex ikollna staġun pożittiv għax bħalma taf iċ-Challenge League huwa kampjonat diffiċli u bilanċjat fejn kull tim ikun ippreparat.
Iddeskrivi l-esperjenzi passati tiegħek ma’ Marsaxlokk FC u Mtarfa FC u kemm tgħallimt minnhom.
L-esperjenza ma’ Marsaxlokk FC kienet waħda sabiha fejn iffirmajt mal-klabb wara li kien għadu kif rebah il-promozzjoni mill-Amateur League u rrnexxielna nirbħu l-promozzjoni għall-Malta Premier wara t-tieni staġun.
Min-naħa l-oħra, l-esperjenza ma’ Mtarfa FC kienet waħda mill-aktar esperjenzi diffiċli fil-karriera tiegħi, fejn irnexxielna nagħmlu dak li jista’ jissejjaħ ‘miraklu sportiv’ billi ktibna l-istorja tal-klabb u żammejna postna fiċ-Challenge League minkejja l-problemi kbar finanzjarji u amministrativi li kellu l-klabb, mingħajr l-għajnuna ta’ ħadd. Dan irnexxielna nagħmluh għax konna grupp ta’ plejers li taħt it-tmexxija tal-kowċ Rodney Bugeja lgħabna għal xulxin, u tista’ tgħid sirna familja waħda.
X’tikkummenta fuq il-livell tal-futbol Malti fil-preżent?
Il-futbol Malti għamel avvanz kbir f’dak li għandu x’jaqsam ma’ riżultati fl-Ewropa, peró għad hemm ħafna iżjed xi jsir biex forsi xi darba nilħqu l-livell ta’ pajjiżi hekk imsejħa tamparna jew akbar.
U dak tar-riżorsi (grawnds) fejn titħarrġu u tilagħbu l-logħob kompetittiv tagħkom?
Il-faċilitajiet tal-grawnds huma dawk li huma. Sar progress notevoli minn ċerti klabbs, peró fadal ħafna iżjed xi jsir u nemmen li għandhom jinbnew grawnds ġodda iżjed addattati, speċjalment fejn jintlagħbu l-kampjonati maġġuri.
Kif qed tħares lejn il-futur aktar imbiegħek tiegħek fil-futbol? Għad narawk kowċ ‘il quddiem?
Ma nista’ neskludi xejn. L-għan tiegħi fil-preżent huwa li nżomm ruħi fit biex nibqa’ għaddej. Peró, ma neskludix li nista’ nkompli bil-karriera tal-kowċing fil-futur, f’dak li għandu x’jaqsam ma’ kowċ tal-goalkeepers.
Għaddi messaġġ finali lil min jixtieq jagħmel karriera ta’ suċċess fil-futbol.
Tieqfu qatt toħolmu, taspiraw u temmnu biex taslu fejn tixtiequ! Id-dedikazzjoni, id-dixxiplina u l-imħabba lejn il-logħba tal-futbol huma fundamentali biex wieħed jasal fejn jixtieq!