Alhaji hu immigrant ieħor li għadu kif għalaq l-20 sena. It-talba għall-ażil tiegħu ma intlaqgħetx. Hu qiegħed jaħdem legalment b’permess tax-xogħol. Wara li nħareġ mid-detenzjoni, hu permezz ta’ ħaddiema soċjali għamel CV.
Qassamha ħafna minnha iżda ma rnexxielux isib xogħol. Kien avviċina aġenzija li tirrekluta l-ħaddiema. Din l-aġenzija sabitlu impjieg f’fabbrika. Ħadem għal tlett xhur bla kuntratt. Jgħid li din il-fabbrika hi magħrufa sew u għandha ħafna barranin jaħdmu magħha anki persuni bla document. Dawn jikru ħafna ħaddiema. Imma malajr jitfgħuk ‘lbarra.
Qatt ma taf kemm se ddum magħhom fix-xogħol. Dawn isegwu lill-ħaddiema bil-cameras li hemm u jekk twaqqa’ xi ħaġa milli jkollok quddiemek, immedjatament tispiċċa barra. Konna ningħataw biss 15-il minuta ħin tal-mistrieħ f’ġurnata xogħol ta’ tminn sigħat. “Dan mhux xogħol imma skjavitù”, jgħid Alhaji.
