Fgura Kenky kisbu rebħa importanti ta’ 5-3 kontra Ħamrun Bayern A fl-iktar logħba mistennija mill-kampjonat tal-Ewwel Diviżjoni tad-Darts.
Il-Fgurin kienu qed jitilfu 2-0 iżda għarfu jdawwru l-iskor favurihom għal 4-2. F’mument minnhom, Ħamrun Bayern A naqqsu l-marġni tal-iskor iżda l-avversarji tagħhom rebħu l-aħħar game sabiex b’hekk ħarġu bit-tliet punti ferm kruċjali.
F’aktar logħbiet, Ħamrun Bayern B u Floriana Ajax kisbu rebħiet identiċi ta’ 5-3 kontra Top Gun Bar u Sliema Inter Darts Club rispettivament.
Fil-kampjonat tat-tieni diviżjoni, Birżebbuġa Lions ikkonfermaw il-mument pożittiv tagħhom wara li għelbu lil PO’s Bar 6-2.
Cox Bar irritornaw għar-rebħ wara suċċess ta’ 5-3 kontra Fgura Maypole filwaqt li Beland Żejtun rebħu bl-istess skor lil Każin Madonna tal-Ġilju.
Finalment fit-tielet diviżjoni, Juventutis Domus kellhom riżultat pożittiv ta’ 5-3 fid-derby taż-Żejtun kontra Leah’s Bar filwaqt li Żebbuġ Rangers għelbu lil Duke’s B 5-3.
Duke’s A ħadu walk-over ta’ 8-0 kontra Mqabba FC.
