Floriana Ajax MCP A komplew għaddejjin bil-mument pożittiv tagħhom hekk kif żammew fi dro ta’ 4-4 lil-liders tal-kampjonat 8-a-side Qormi Hockey A.
Kienet logħba ta’ botta u risposta bejn żewġ timijiet li offrew darts mill-isbaħ u li paxxiet lil dawk kollha li kienu preżenti għal din il-logħba. Wara vantaġġ inizjali min-naħa tal-Furjaniżi, il-Qriema wettqu reazzjoni tajba u ġabu l-iskor indaqs fiż-żewġ sets ta’ wara.
Il-logħba baqgħet għaddejja b’ritmu ferm għoli għalkemm iż-żewġ timijiet kellhom jikkuntentaw b’punt wieħed.
Sadanittant Ħamrun Bayern A ma sabuhiex daqshekk faċli sabiex jegħlbu lil Sliema Inter DC 5-3 filwaqt li Ħamrun Education u PO’s Bar kisbu tliet punti importanti wara rebħiet fuq Manchester Conquest 5-3 u Floriana Ajax MCP B 7-1 rispettivament.
Fit-tieni diviżjoni, Qormi Hockey Club B baqgħu jżommu r-ritmu u kisbu rebħa tajba ta’ 5-3 kontra Top Gun li biha baqgħu jżommu l-ewwel post tal-klassifika. L-istess skor ġie reġistrat fil-konfront bejn Fgura Darts B u Munchies Bar b’tal-ewwel li joħorġu rebbieħa.
Żurrieq FC ukoll kienu fuq in-naħa rebbieħa wara skor ta’ 7-1 kontra Birżebbuġa St Peters.
Finalment fit-tielet diviżjoni, il-liders baqgħu Banda Birżebbuġa 1990 li għelbu lil Qormi Hornets 5-3 b’Beland Bull’s Eye li rreġistraw l-istess riżultat kontra Mqabba FC.
St Pauls Diamonds iddominaw u għelbu lil Education Ladies 7-1.
