Ħamrun Bayern A żammew lil Ħamrun Education fi draw ta’ 4-4 sabiex dawn tal-aħħar naqqsu milli jiksbu r-rebħa li tant xtaqu sabiex iżommu l-pass mar-rivali Qormi Hockey Club A.
Hekk kif intlagħbet ġurnata oħra mill-kampjonat tal-Ewwel Diviżjoni tad-Darts, kien derby ferm missielet bejn żewġ timijiet li qed jokkupaw it-tieni u t-tielet post rispettivament. Wara li sabu ruħhom 4-0 minn taħt, l-ewwel tim ta’ Bayern naqas milli jaqta’ qalbu, wettaq reazzjoni u rebaħ l-erba’ games ta’ wara sabiex kiseb draw drammatiku.
Min-naħa tagħhom il-liders Qormi Hockey Club A għelbu lil Sliema Inter DC 5-3 b’dawn tal-aħħar li dejjem baqgħu fil-logħba għalkemm id-determinazzjoni tal-Qriema ppremjathom bit-tliet punti tant importanti.
Fid-derby tal-Furjana, Floriana Ajax A ftit sabu diffikulta’ sabiex jegħlbu lil Floriana Ajax B 7-1 filwaqt li Manchester Conquest Pub ukoll sabuha faċli kontra PO’s Bar tant li rebħulhom 7-1.
Fil-kampjonat tat-tieni diviżjoni, il-leaders il-ġodda huma Fgura B li barra minn darhom għelbu lil Żurrieq FC 6-2. Qormi Hockey Club B baqgħu jżommu l-pass wara rebħa simili kontra Munchies Bar b’Ħamrun Bayern B jibqgħu konsistenti hekk kif għelbu lil Top Gun 5-3.
Whyte Hart saħħew it-tielet post b’rebħa faċli ta’ 8-0 kontr a St Peter’s Band Club.
Fil-kampjonat tat-tielet diviżjoni, Banda Birżebbuġa 1990 baqgħu jżommu l-ewwel post wara rebħa ta’ 6-2 kontra St Paul’s Diamonds. Anke Beland u Fgura A rebħu bl-istess skor lil Education Ladies u Cox Bar rispettivament. Finalment fid-derby tal-Imqabba, Tal-Ġilju u Mqabba FC temmew il-konfront ta’ bejniethom fi draw ta’ 4-4.
Sadanittant f’nofs il-ġimgħa ngħata bidu għall-Premier League of Darts, fejn l-aqwa plejers jikkompetu kontra xulxin. Mill-ewwel ġurnata, kienu John Agius u Eucharist Baldacchino li għaddew għat-tieni fażi wara sensiela ta’ logħob.
Dan il-kampjonat se jibqa’ għaddej fil-ġimgħat li ġejjin sabiex jiġi determinati r-rebbieħa finali.
