Fit-tieni ġurnata tal-Malta Darts Open li qed isiru fil-Kumpless Sportiv ta’ Ħal Kirkop reġa’ spikka l-kunjom Satariano hekk kif wara li Matti spiċċa fit-tieni post tal-Malta Masters Youths, issa kien imiss kuġinuh Kyle Satariano li fl-eta’ ta’ 10 snin rebaħ il-kategorija open taż-żgħażagħ meta għeleb lill-istess Matti fil-finali.
Minkejja li Kyle kien qed jitlef 3-0, hu għaraf idawwar il-logħba favurih sabiex finalment rebaħ 5-4.
Fil-kategoriji l-oħra, l-ebda Malti ma rnexxielu jasal sal-aħħar tal-kompetizzjoni. Fis-singles tal-irġiel kien Philip Van Gasse tal-Belġju li għeleb lil Benjamin Pretmer tas-Slovenja 5-1. Il-plejers Maltin Enrico Scerri, Dennis Fenech, Mario Sciascia, Olwyn Abela, Eucharist Baldacchino, Norbert Attard u Alfred Muscat irnexxielhom jaslu sal-fażi tal-aħħar 64 ta’ din il-kompetizzjoni.
Fil-kategorija singles tan-nisa kienet il-Kroata Anca Ziljstra li għelbet 5-1 lill-Ingliża Paula Jacklin. Mill-banda l-oħra, il-Maltin Bev Keen u Althea Ciantar waslu sal-fażi tal-aħħar 32.
Fil-kategorija tal-ParaDarts, Malta ħadet sehem permezz ta’ Joseph Martin li wasal sal-kwarti tal-finali u tilef kontra r-rebbieħ eventwali d-Daniż Allan Rask 4-1. Dan tal-aħħar baqa’ għaddej u għeleb lill-Ingliż Jonathan Hirst 5-2.
Illum tintlagħab l-aħħar ġurnata ta’ dan it-turnament internazzjonali.
