Qormi Hockey Club A huma ċ-champions il-ġodda tal-Ewwel Diviżjoni tad-darts għall-istaġun 2021/2022 meta fid-decider għelbu lil Ħamrun Bayern A 5-3.
Kienet logħba ferm sabiħa, emozzjonanti u milgħuba fi spirtu sportiv. Iż-żewġ timijiet kienu spiċċaw l-impenji tagħhom fil-kampjonat b’punti indaqs u għalhekk kienet meħtieġa din il-partita deċiżiva għal min se jirbaħ it-titlu finali.
Kienet ukoll logħba ta’ botta u risposta fejn għalkemm il-Qriema kienu dejjem fil-vantaġġ, il-Ħamruniżi dejjem ġabu l-iskor indaqs sabiex il-konfront baqa’ inċert sal-aħħar.
Kien biss fl-aħħar game li Qormi Hockey Club A żiedu d-distakk sabiex setgħu jiċċelebraw it-titlu finali.
Il-Qriema kitbu wkoll paġna storika minħabba li rnexxielhom jitilgħu mit-tielet għall-ewwel diviżjoni bħala champions u kkonfermaw il-potenzjal tagħhom.
Sadanittant il-Qriema għamlu wkoll double minħabba li t-tieni tim tagħhom iġifieri Qormi Hockey Club B rebħu l-kampjonat tat-tieni diviżjoni b’Banda Birżebbuġa 1990 li saru champions tat-tielet diviżjoni.
Finalment fil-bidu ta’ din il-ġimgħa ntrebaħ ukoll il-kampjonat 5-a-side minn Floriana Ajax MCP A meta fl-aħħar logħba tal-kampjonat għelbu lil Ħamrun Education Bar 3-2.
