Sliema Inter Darts Club wettqu sorpriża fil-kampjonat tal-Ewwel Diviżjoni tad-darts meta kontra kull mistenni għelbu lil Ħamrun Education 5-3.
Is-Slimiżi ħarġu mal-ewwel bl-intenzjonijet tagħhom ċari u rebħu l-ewwel legs inizjali u minkejja li kien hemm reazzjoni min-naħa ta’ Ħamrun, ma kinitx biżżejjed sabiex jieħdu xi ħaġa minn dan il-konfront. B’din ir-rebħa s-Slimiżi telgħu għal għaxar punti fil-klassifika filwaqt li din it-telfa kienet daqqa ta’ ħarta għall-Ħamruniżi li l-aspirazzjoni tagħhom hu li jibqgħu viċin il-liders Qormi Hockey Club A.
Sadanittant Qormi Hockey A kisbu rebħa ta’ 6-2 kontra Manchester Conquest Pub sabiex issa żiedu l-vantaġġ tagħhom għal sitt punti fil-klassifika.
Ħamrun Bayern A ixxalaw u għelbu 7-1 lil Floriana Ajax B filwaqt li Floriana Ajax A kellhom logħba diffiċli kontra PO’s Bar għalkemm xorta rebħu 5-3.
Fit-tieni diviżjoni, l-akbar rebħa kisbuha Qormi Hockey Club B li għelbu 8-0 lil Birżebbuġa St Peter’s filwaqt li Fgura B u Buġibba Whyte Hart kisbu rebħiet fuq Ħamrun Bayern B (6-2) u Żurrieq FC (5-3) rispettivament.
Finalment kellna draw ta’ 4-4 bejn Top Gun Bar u Munchies.
Fit-tielet diviżjoni, Banda Birżebbuġa 1990 u Beland Bull’s Eye kisbu rebħiet kbar ta’ 7-1 u 8-0 kontra Mqabba tal-Ġilju u Fgura A rispettivament.
Min-naħa l-oħra, Cox Bar u St Paul’s Diamonds ma sabuhiex faċli kontra Mqabba FC u Qormi Hornets għalkemm xorta waħda rebħu bi skor identiku ta’ 5-3.
Sadanittant mill-Premier League of Darts kellna lil Albert Scerri u Norbert Attard li kkwalifikaw għat-tieni fażi wara li rebħu l-logħbiet rispettivi tagħhom u b’hekk ingħaqdu ma’ Enrico Scerri, Lawrence Spiteri, John Agius u Eucharist Baldacchino rispettivament.
