Pajjiżna baqa’ jgawdi mill-aħjar rati mill-aġenzija internazzjonali DBRS Morningstar hekk kif ġie ikkonfermat r-rating ta’ pajjiżna bħala A (għolja) stabbli.
Fir-rapport tagħha, din l-aġenzija nnutat kif r-rati kbar li bihom kibret l-ekonomija Maltija. Wara kontrazzjoni qawwija fl-2020, Malta rkuprat bil-qawwa mill-pandemija tal-COVID-19 u r-ritmu tat-tkabbir kompla matul l-2022.
L-andament ekonomiku ta’ Malta qabel il-pandemija kien wieħed notevoli. Wara tnaqqis fil-PDG ikkawżat mill-pandemija ta’ 8.6% fl-2020, Malta rreġistrat wieħed mill-aktar irkupri rapidi fl-UE ta’ 11.7% fl-2021 u 7.6% sena wara sena matul l-ewwel tliet trimestri tal-2022.
Il-miżuri ta’ appoġġ tal-gvern kellhom rwol ewlieni fil-protezzjoni tas-settur privat mill-pandemija kif ukoll il-limitazzjoni tal-effetti persistenti potenzjali. F’dan is-sens, l-impjiegi komplew jiżdiedu matul l-2020 u l-2021, parzjalment minħabba l-iskema ta’ kumpens għall-pagi, u r-rata tal-qgħad kienet ta’ 2.9% mit-tieni kwart tas-sena 2022.
L-aġenzija kompliet tinnota kif l-impatt mill-invażjoni tar-Russja fl-Ukrajna fuq l-ekonomija Maltija s’issa baqa’ limitat, parzjalment minħabba r-rabtiet ekonomiċi u enerġetiċi baxxi ta’ Malta maż-żewġ pajjiżi, il-miżuri tagħha għall-istabbilizzazzjoni tal-enerġija, u rebound tat-turiżmu barrani aktar b’saħħtu milli mistenni din is-sena.
Fuq nota pożittiva, ġie nnutat ukoll kif id-deċiżjoni tat-Task Force ta’ Azzjoni Finanzjarja (FATF) li tneħħi lil Malta mil-lista ta’ ġurisdizzjonijiet tagħha taħt monitoraġġ imsaħħaħ, l-hekk imsejħa “lista l-griża”, f’Ġunju 2022 tirrifletti l-progress sinifikanti tal-pajjiż fit-titjib tal-qafas u l-effettività tiegħu kontra l-Ħasil tal-Flus/il-Ġlieda Kontra l-Finanzjament tat-Terroriżmu.
B’kitba fuq il-midja soċjali dwar dan il-Prim Ministru Robert Abela, qal li dan juri kif ir-riżultat elettorali saħħaħ l-aspettattiva għall-impenn politiku kontinwu biex itejbu l-qafas istituzzjonali u l-governanza ta’ Malta.
