Declan Rice insisti li huwa kuntent ma’ West Ham United u huwa impenjat bis-sħiħ mal-club, minkejja l-ispekulazzjonijiet li jorbtuh ma’ pass lejn Manchester United jew Chelsea.
Ir-Red Devils u l-Blues huma mistennija jirreġistraw l-interess tagħhom fil-player ta’ 22 sena – li huwa stmat għal madwar £90m – qabel l-istaġun 2022-23.
Madankollu, il-prodott tal-akkademja tal-Hammers qed igawdi l-esperjenza tiegħu fil-London Stadium, regolarment jilbes il-faxxa ta’ captain waqt li Mark Noble qed ikun inkluż mas-sostituti, u jemmen li l-partitarji jirrikonoxxu tnaqqis fil-forma jekk ikun distratt mill-ispekulazzjoni.
Meta tkellem mal-istampa qabel il-konfront tal-Europa League ta’ West Ham kontra Rapid Vienna nhar il-Ħamis, Rice qal:” Kulħadd jaf kif inħossni dwar West Ham!”
“Qed nilgħab bi tbissima fuq wiċċi, u ninsab kuntent li qed immexxi t-team bħala captain. L-uniku għan tiegħi hu li noħroġ fil-ground u nagħti kollox għall-club u nikseb it-tliet punti.”
Rice għamel 152 dehra fil-kompetizzjonijiet kollha għal West Ham u lagħab ukoll 26 darba għat-team nazzjonali Ingliż.
