Minn Cristian Muscat
Kif bdiet l-imhabba tiegħek lejn il-futbol?
Għalkemm qatt ma missejt ballun formalment fil-futbol, tista’ tgħid li minn dejjem kien parti minn ħajti. Ħuti t-tnejn minn dejjem u għadhom jilgħabu l-futbol, b’hekk qattajna ħafna ħin nilagħbu flimkien fi tfulitna kif ukoll smajt ħafna fuq il-futbol jiena u nikber. Interessajt ruħi nibda l-futbol meta kelli 16-il sena peró qatt m’għamilt il-pass. Ftit tas-snin ilu, dħalt f’kuntatt mal-klabb tas-Swieqi United FC fejn beda il-vjagg tiegħi fil-futbol tan-nisa bhala Team Manager. Minn dan l-istaġun, ħadt ir-rwol ta’ Uffiċjal tal-klabb fis-settur tan-nisa.
Iddeskrivi r-rwol tiegħek bħala Uffiċjal tal-klabb tat-tim tan-nisa ta’ Swieqi United FC.
L-irwol tiegħi huwa li nkun il-link bejn il-klabb, il-kumitat u t-tim. Il-funzjoni tal-Uffiċjal tal-klabb huwa essenzjali biex il-klabb jassigura li l-filosofija tiegħu li hija ‘One Team, One Club’, tiġi implimentata fil-prattika. Dan il-link jassigura illi jkun hemm komunikazzjoni u ħidma lejn l-istess valuri u għanijiet.
X’taħseb kien is-sigriet tas-suċċess wara r-rebħ tal-ewwel kampjonat storiku minn Swieqi United FC fil-jiem li għaddew?
Din kienet ħolma li l-klabb ilu jemmen u jaħdem għaliha mill-bidu li twaqqaf it-tim tan-nisa. B’mod speċjali l-president tal-klabb Dr Justin Fenech li dejjem emmen, stinka u ta s-sapport kontinwu tiegħu biex din il-ħolma ssir realtá, flimkien mal-kumplament tal-kumitat tal-klabb. Dan sar permezz tar-riżorsi, investiment u għajnuna kif u fejn kien hemm bżonn.
Bħalma jaf kullħadd, speċjalment dawn l-aħħar snin, spiss konna viċin li niksbu l-unuri. Din is-sena erġajna tajna sforz ġdid, b’xi bidliet neċessarji li flimkien waslu biex ksibna l-ewwel kampjonat tagħna. Kburin iktar bir-rizultat ta din is-sena l-ghaliex kienet l-ewwel sena fejn rajna l-erba’ timijiet tat-Top 4 jissieltu għar-rebħ sal-aħħar nett. B’hekk il-kompetizzjoni kienet ferm iktar kiefra, eċitanti u iebsa.
Pero, kellna staff tekniku, li ħadem b’dedikazzjoni u passjoni assoluta, immexxija mill-Head Coach Dorianne Theuma. Ħadmu flimkien biex joħolqu programm ta taħrig adekwat li fih il-plejers setgħu mhux biss ikunu ppreparati għall-istaġun, izda ħadmu sew fuq it-teknika, t-tattika u l-fiżika tagħhom biex setgħu jkunu dominanti u jgħatu sfida b’saħħitha lill-avversarju tagħna.
Fuq kollox kellna tim ta’ plejers li taw qalbhom u wrew it-talent tagħhom kemm fit-taħrig kif ukoll fil-logħob. Ingħaqdu flimkien biex joħolqu ambjent sabiħ fit-tim. Apparti minn hekk, laqgħu l-isfidi tal-kowċis tagħhom biex jagħtu ħilithom kollha u jibqgħu kunsistenti fit-taħriġ.
Kif tqis il-livell tal-futbol tan-nisa f’pajjiżna fil-preżent?
Il-livell tal-futbol femminili f’Malta għamel ħafna żvilupp f’dawn l-aħħar snin, u sena wara sena qegħdin naraw klabbs jagħtu l-appoġġ tagħhom lejn it-timijiet tan-nisa kif ukoll itejbu l-investiment lejn dan is-settur. Il-klabb ta’ Swieqi United FC dejjem kien minn tal-ewwel li jagħmel dan, ispirat mil-filosofija tal-klabb ‘one team one club’, kif semmejt qabel. Tant hu hekk illi Swieqi United FC kien minn ta l-ewwel klabbs li introduċa l-kuntratti semi-professjonali għall-plejers femminili.
Anke fuq livell nazzjonali qed naraw is-suċċess li qed jikseb it-tim nazzjonali tan-nisa kontra timijiet b’saħħithom ħafna. Għandna wkoll ħafna iktar plejers Maltin femminili li qed isibu posthom u jiksbu riżultati f’timijiet barra minn xtutna.
Nafu peró, li xorta waħda għad hemm ħafna li għandu jsir fil-pajjiż biex jintlaħqu standards internazzjonali kif ukoll li jingħelbu ċerti sfidi li timijiet jiffaċċjaw bħal nuqqas ta’ riżorsi, inqas opportunitajiet ta’ kompetizzjoni u biżżejjed għarfien pubbliku.
Madankollu, hemm tendenzi pożittivi, bħal żieda fl-iżviluppi fl-akkademji tal-futbol femminili u aktar għajnuna mill-assoċjazzjonijiet sportivi. B’mod ġenerali, il-futur tal-futbol femminili f’Malta jista’ jkun promettenti jekk ikompli jiġi appoġġjat b’investiment u infrastruttura aħjar.
U dak tal-grawnds fejn tilagħbu l-logħob tagħkom?
Kemm ilna li l-logħob tan-nisa tal-kbar sar jintlagħab fi tmiem il-ġimgħa, żgur li kien hemm żieda fin-numru ta partitarji li ġew jaraw il-logħoba kif ukoll tejbet il-mod ta kif il-plejers jistgħu jinżlu iktar preparati għal-logħob. Din li hija xi ħaġa li xtaqna u ħdimna għaliha flimkien ma klabbs oħra. Madanakollu, xorta nemmen li ċertu manutenzjoni fil-pitches fejn jintlagħab il-logħob, żgur li tista’ titjieb il-kwalitá tal-grounds biex l-istandards tall-logħba u l-plejers jagħmlu l-iżvilupp li għandhom bżonn.
Kif qed tħares lejn il-futur tiegħek fil-futbol?
Jiena persuna li nħobb l-isfidi. Issa li għelibna l-isfida tal-kampjonat lokali inħares ‘il quddiem biex filimkien mal-klabb, it-tim tekniku u l-iskwadra, naraw kif nistgħu nibqgħu ngħollu l-livell tal-kwalitá tal-futbol kemm tagħna personali b’mod lokali, b’mod internazzjonali kif ukoll l-istandards tal-futbol tan-nisa lokalment. Eċitati biex nikkompetu fil-UEFA Women’s Champions League is-sajf li ġej u kommessi li nagħmlu l-almu kollu taghna, kif dejjem għamilna, biex niksbu riżultati tajbin.
Għaddi messaġġ finali speċjalment lill-bniet u tfajliet li jixtiequ jagħmlu karriera ta’ suċċess fil-futbol.
L-għażla li tagħżlu li ssegwu karriera fil-futbol hija waħda ta’ kuraġġ, dedikazzjoni, u passjoni. Forsi kieku kelli ngħati xi parir huwa biex “qatt ma tħallu l-ostakli jew id-diffikultajiet jikkontrollawkom”. Il-futbol huwa sport miftuħ kemm għall-irġiel kif ukoll għan-nisa u l-passi żgħar li tieħdu llum jistgħu jwasslu għal opportunitajiet kbar għada bħalma sar fil-passat s’issa.
Apparti minn hekk, il-futbol, bħal mhu kull sport ieħor, jirrikjedi dixxiplina, ħidma iebsa u umiltá biex tilħaq is-suċċess. L-umiltà li tibqa’ impenjata għall-iżvilupp tiegħek u l-ħila li titgħallem mill-iżbalji u toffri l-aħjar mill-aħjar tiegħek għal kull opportunitá li tiġi quddiemek!
