Laqgħa bejn il-Kummissarju tal-Volontarjat Jesmond Saliba u l-Ministru Evarist Bartolo
Il-Kummissarju għall-Organizzazzjonijiet Volontarji Jesmond Saliba għamel żjara ta’ korteżija lill-Ministru għall-Affarijiet Barranin u Ewropej Evarist Bartolo fl-isfond tas-sitwazzjoni umanitarja li qed tiżviluppa fl-Ukrajna u l-pajjiżi mal-fruntiera.
Tul il-laqgħa ġie diskuss l-irwol u l-impenn ta’ numru ta’ għaqdiet volontarji li qed jieħdu bil-għan li jintlaħqu il-ħtiġijiet umanitarji li qed jirriżultaw kawża ta’ din il-gwerra.
Iż-żewġ partijiet tkellmu dwar il-ħtieġa ta’ koordinazzjoni fl-isforzi li qegħdin isiru biex l-għajnuna li tinġabar lokalment tkun dik meħtieġa u titwassal għand min għandu bżonn. F’dan il-kuntest, mistennija jsiru laqgħat fil-jiem li ġejjin.
Il-Ministru kif ukoll il-Kummissarju esprimew l-apprezzament tagħhom lejn għaqdiet volontarji u individwi li qegħdin jieħdu numru ta’ inizjattivi biex tittaffa t-tbatija kkawżata minn dan il-kunflitt.
