Ħamsin jum wara li ttestja pożttiv fid-doping, il-midfielder ta’ Juventus, Paul Pogba, mistenni jingħata sospensjoni ta’ sentejn.
Il-media Taljana tat dettalji kif il-Franċiż ta’ 30 sena għadu sospiż bħala prekawzjoni wara r-riżultati tat-test tad-doping tiegħu fl-aħħar ta’ Awwissu u kontro-analiżi sussegwenti li t-tnejn irriżultaw pożittivi għad-DHEA, li jistgħu jgħinu biex tiżdied il-produzzjoni naturali ta’ testosterone.
Pogba jista‘ jkun f’riskju li jingħata sospensjoni ta’ erba’ snin, iżda dan jidher improbabbli, hekk kif jiddependi kemm huwa se jikkopera … li min-naħa tiegħu dejjem kien għad-dispożizzjoni tal-mistoqsijiet li sarulu.
Il-kodiċi kontra d-doping jippermettu penali inqas severa jekk l-akkużat jammetti r-responsabbiltà tiegħu, u għalhekk jidher li hija aktar probabbli sospensjoni ta’ sentejn.
Huwa maħsub li Pogba għandu żewġ għażliet – li jilħaq ftehim mal-prosekuturi għal nofs it-tul tas-sospensjoni inizjalment mitluba, li jkun jeħtieġ ukoll il-dawl aħdar mill-WADA, jew jirriskja kollox fi proċess fit-Tribunal tal-Isport Anti-Doping. Fl-ewwel istanza, ma jkunx jista’ jappella iżda fit-tieni jista’ xorta jappella lill-CAS.
