L-attakkant ta’ Fiorentina Dusan Vlahovic hu lest li jmur jilgħab fil-Premier League fost interess minn għadd ta’ clubs fosthom Manchester United, Manchester City u Tottenham Hotspur.
Iż-żagħżugħ ta’ 21 sena stabbilixxa lilu nnifsu bħala wieħed mill-aktar attakkanti mfittxija, wara li skorja 16-il goal f’20 dehra fil-kampjonat dan l-istaġun, tlieta aktar minn kwalunkwe player ieħor fl-ogħla livell Taljan.
Vlahovic, li huwa stmat mill-Viola fir-reġjun ta’ £75 miljun, fl-aħħar xhur kien marbut kemm mal-clubs ta’ Manchester kif ukoll ma’ Spurs u Arsenal, Chelsea, Real Madrid u Paris Saint-Germain.
It-timijiet tal-Premier League ingħataw spinta fl-insegwiment tagħhom lejn l-internazzjonali tas-Serbja, peress li hu jippreferi li jmur l-Ingilterra jekk jiddeċiedi li jħalli lil Fiorentina.
Ċaqliq ma’ Arsenal għal Vlahovic huwa improbabbli peress li l-attakkant għandu interess akbar li jingħaqad jew ma’ Man United, Man City jew Spurs.
Vlahovic, li mistenni jibqa’ Firenze għall-kumplament ta’ dan l-istaġun, fadallu 18-il xahar fil-kuntratt tiegħu u għalkemm il-Viola qed ifittxu li jestendu l-ftehim tal-attakkant, trasferiment ta’ flus kbar lil wieħed mill-clubs elite Ewropej fis-sajf ta’ 2022 huwa mistenni.
