Raġel ta’ 32 sena minn Ħaż-Żebbuġ kien immultat €2,000 wara li ammetta li kellu fil-pussess tiegħu annimal perikoluż – Panthera Pardus – li ma kienx reġistrat biex iżommu.
Eric Attard ammetta wkoll li fis-26 ta’ Ottubru 2021 u fil-ġranet u x-xhur ta’ qabel, żamm dan l-annimal f’sit li ma kienx approvat mid-Direttur u mhux ġewwa stabbiliment żooloġiku.
Il-Qorti preseduta mill-Maġistrat Gabriella Vella sabitu ħati ta’ dawn l-akkużi iżda mhux ħati li wettaq reat waqt perjodu operattiv ta’ libertà kkundizzjonata għal sentejn u dan minħabba nuqqas ta’ provi.
Huwa kien immultat €2,000, li jistgħu jitħallsu b’pagamenti kull xahar fuq perjodu ta’ sena.
Fid-dawl li l-Prosekuzzjoni u d-Direttorat tas-Servizzi Veterinarji rtiraw it-talba għall-konfiska tal-annimal, il-Qorti astjentiet milli tieħu konsiderazzjoni tat-talba tal-Prosekuzzjoni.
