Speċi aljena ta’ ‘crayfish’ li invadiet partijiet minn tliet widien se tinqabad biex wara li jsir studju fuqha ħalli jiġi stabbilit jekk hux tagħmel ħsara lill-ambjent lokali tingħata bħala għalf lil numru ta’ rettili.
Dan sar magħruf waqt żjara li l-Ministru għat-Turiżmu u l-Protezzjoni tal-Konsumatur Julia Farrugia Portelli u l-Ministru għall-Ambjent, it-Tibdil fil-Klima u l-Ippjanar Aaron Farrugia għamlu f’Wied il-Baħrija fir-Rabat.
Flimkien ma’ Wied Għajn Żejtuna fil-Mellieħa u Wied l-Isperanza fil-Mosta f’dan il-wied hemm speċi aljena ta’ ‘crayfish’ li mhux biss qed tikkawża ħsara kbira lill-ekosistema tal-widien imma qed tipperikola l-ispeċi indiġeni tal-ilma ħelu fosthom il-qabru.
Il-proġett b’investiment ta’ €20,000 minn Parks Malta u b’kollaborazzjoni mal-Università ta’ Malta u l-Awtorita’ għall-Ambjent u r-Riżorsi (ERA) jaħseb għall-installazzjoni ta’ numru ta’ nases sabiex jinqabad dan il-‘crayfish’ u jsir studju dwar l-impatt tiegħu.
Il-Ministru Farrugia Portelli sostniet li bħala ministeru għandha d-dover li tipproteġi l-ekosistemi fil-widien biex kemm jista’ jkun dawn jinżammu fl-istat naturali tagħhom u b’hekk jitgawdew kemm min-nies tal-lokal kif ukoll mit-turisti.
Il-Ministru Farrugia ukoll saħaq li biex inħarsu l-ispeċi endemiċi u dawk protetti li nsibu fil-pajsaġġ Malti hemm bżonn li jitneħħew dawk l-ispeċi aljeni invażivi li ħafna drabi jkunu ta’ theddida ħalli b’hekk tiġi protetta l-ekosistema kif ukoll il-flora u l-fawna ta’ pajjiżna.
Il-Professur Alan Deidun spjega kif l-awwista tal-ilma ħelu (red swamp crayfish) hija speċi aljena invażiva li ġejja minn artijiet ’il bogħod fosthom mix-Xlokk tal-Istati Uniti u ġiet introdotta f’numru ta’ widien f’Malta u Għawdex b’konsegwenza ta’ ħsara kbira lill-fawna lokali u indiġena.
Huwa spjega li din l-ispeċi m’għandhiex għedewwa naturali u tiekol il-bajd u ż-żgħar ta’ ħafna speċi indiġeni tal-ilma ħelu bħal qabru u ż-żrinġ waqt li semma kif hemm bżonn aktar riċerka fuq din l-ispeċi biex nifhmu aħjar x’inhu l-impatt ekoloġiku tagħha.
L-ufficjal inkarigat mill-immaniġġjar tal-widien Alexander Borg Galea spjega li bl-għajnuna tal-Earth Systems Association (ESA) dan il-monitoraġġ se jkun qiegħed jinforma lilhom u lill-ERA dwar kemm hija effettiva l-metodoloġija użata għall-kontroll tal-‘crayfish’.
Arnold Sciberras, konsulent xjentifiku, irrimarka kif in-nases li qed jitpoġġew f’dawn il-widien huma kollha minn studji-piloti li ġew minn riċerka barra minn pajjiżna iżda li ġew addattati għall-ambjent Malti waqt li spjega kif it-tip ta’ nassa u lixka li se tintuża hija maħsuba biex kemm jista’ jkun jinqabad il-‘crayfish’ biss u mhux xi speċi indiġena.
