Il-Baġit 2026 ikompli jikkonferma triq ċara: pajjiż li jħares ’il quddiem, ekonomija b’saħħitha u futur ibbażat fuq il-familja, l-edukazzjoni, id-diġitalizzazzjoni u l-kwalità tal-ħajja.
Dan il-baġit jagħti messaġġ ta’ fiduċja: Malta għandha direzzjoni, għandha stabbiltà u għandha viżjoni. Pajjiż li mhux biss qed jirkupra minn sfidi globali, imma qed jissaħħaħ b’mod intelliġenti u bbażat fuq l-innovazzjoni.
Il-familja u l-edukazzjoni fil-qalba tal-baġit
Il-familja Maltija u Għawdxija tibqa’ fiċ-ċentru ta’ kull deċiżjoni. Dan hu baġit li jkompli jsaħħaħ il-familja permezz ta’ miżuri diretti, għajnuna soċjali, u skemi ta’ taħriġ u impjiegi ġodda.
Imma fl-istess waqt, il-familja trid tkun imħarrġa u lesta għall-era li ġejja — l-era diġitali. Hu għalhekk li l-Baġit 2026 jħares lejn edukazzjoni li tiftaħ orizzonti ġodda, fejn kull tifel u tifla jkollhom aċċess għal għarfien teknoloġiku u għodod intelliġenti li jgħinuhom jikbru b’mod ħieles u kreattiv.
Id-diġitalizzazzjoni u l-programm “AI għal Kulħadd”
Malta llum tinsab fuq quddiem nett f’din ir-rivoluzzjoni teknoloġika. Il-programm “AI għal Kulħadd” li qed jitwessa’ fuq livell nazzjonali hu eżempju ċar ta’ kif it-teknoloġija tista’ tkun inklussiva u soċjali.
Permezz ta’ din l-iskema, mijiet ta’ studenti, edukaturi, ġenituri u ħaddiema diġà qed jibbenefikaw minn taħriġ u aċċess għal pjattaformi bħal Microsoft Copilot u sistemi ta’ intelliġenza artifiċjali li jgħallmu kif wieħed juża l-AI b’mod prattiku, sigur u produttiv.
Din mhijiex biss inizjattiva teknoloġika, iżda pass soċjali kbir ’il quddiem. L-għan hu li ħadd ma jibqa’ lura – la żgħażagħ, la adulti, u lanqas l-anzjani – biex kulħadd ikun parti mill-bidla diġitali li qed toħloq impjiegi ġodda, servizzi aktar effiċjenti u amministrazzjoni pubblika aktar intelliġenti.
Hija il-ħolma tiegħi illi nara lit-tfal, liż-żgħażagħ, u lil ħaddiema ta’ ħutna l-Maltin u Għawdxin jirnexxu u jaħtfu l-aqwa opportunitajiet li pajjiżna qiegħed u ser ikomplu joħloq fil-futur f’ dawn l-oqsma emerġenti, digital u fl-Intelliġenza Artifiċjali.
Ambjent nadif u komunitajiet b’saħħithom
Dan il-baġit jagħti importanza kbira wkoll lill-ambjent fejn ngħixu – għax il-kwalità tal-ħajja mhix biss dwar ekonomija jew edukazzjoni, imma wkoll dwar spazji nodfa u ambjent li joffri serħan il-moħħ.
#Marsaskala
F’Marsaskala, fejn jiena kburi li nirrappreżenta lill-komunità tiegħi, qed nippreparaw pass kbir ’il quddiem. Sena oħra, l-impjant temporanju tad-demel – li għal snin twal kien sors ta’ riħa qawwija u tħassib fost ir-residenti Skalin – se jitneħħa darba għal dejjem.
Fl-istess waqt, ix-xogħol fuq l-impjant tar-riċiklaġġ u fuq l-investiment ta’ €23 miljun f’park modern u ekoloġiku qed jimxi b’pass kostanti. Dan il-proġett se joħloq spazju ġdid għall-familji, fejn it-tfal jistgħu jilagħbu f’ambjent sigur, fejn il-ġenituri jgawdu mistrieħ, u fejn il-komunità kollha tista’ tgawdi minn Marsaskala aktar nadifa, moderna u sabiħa.
Dawn l-inizjattivi juru li l-Gvern mhux biss qed jitkellem fuq futur sostenibbli, iżda qed iwettqu fil-prattika – b’azzjonijiet konkreti fuq l-art, mhux biss fuq il-karta.
Kif dejjem tkellimt, jien ħa nkompli nimbotta sabiex inkabbar l-interess lejn Marsaskala u l-Bajjiet tal-madwar bħal San Tumas sabiex inkomplu ninvestu u nsibu l-opportunitajiet sabiex inkomplu nirriġeneraw is-South ta’ Malta.
Malta li temmen fil-kapaċità tan-nies tagħha
Il-Baġit 2026 hu aktar minn sensiela ta’ miżuri finanzjarji – huwa manifest ta’ fiduċja fil-poplu tagħna. Malta li temmen fil-ħiliet taċ-ċittadini tagħha, li tifhem li l-progress hu ta’ kulħadd, u li tħares lejn il-futur b’għaqda, b’innovazzjoni u b’kuraġġ.
Dan hu baġit li jgħaqqad il-valuri tradizzjonali tal-familja Maltija mal-viżjoni moderna ta’ pajjiż diġitali u sostenibbli. Baġit li jħares lejn il-bniedem, lejn l-edukazzjoni u lejn l-ambjent bħala t-tliet pilastri li fuqhom jinbena futur stabbli u ġust għal uliedna.