L-eks-mexxej Laburista u darbtejn prim ministru tar-Renju Unit, Lord Harold Wilson kien inizjalment ippjana li jbigħ dokumenti personali u politiċi lill-università Kanadiża għal £212,500. Dan kien se jagħmlu biex jgħin jiffinanzja l-kura tiegħu nnifsu, żvelaw dokumenti uffiċċjali
Dokumenti maħruġa mill-Arkivji Nazzjonali juru li Lord Harold Wilson inizjalment ippjana li jbigħ il-kollezzjoni lill-Università McMaster f’Hamilton, il-Kanada, għal £212,500 – l-ekwivalenti ta’ madwar £700,000 fi flus tal-lum.
Wilson, li kien darbtejn il-Prim Ministru Laburista, mill-1964-70 u mbagħad mill-1974-76, kellu l-marda ta ‘Alzheimer u kien jeħtieġ kura kontinwa li l-ispejjeż tagħha kienu kbar u jiżdiedu kontinwament, skond dokument wieħed. Harold Wilson miet fl-1995.
Il-proposta li jinbiegħu dokumenti barra mill-pajjiż kienet qanqlet allarm fost uffiċjali għolja fil-gvern ta’ Margaret Thatcher.
Fil-bidu ta ‘Jannar 1990, is-segretarju tal-kabinett Sir Robin Butler kiteb li l-eks segretarja ta’ Wilson, Lady Falkender, kienet “orkestrat proposta” biex twaqqaf arkivju fil-Kanada għall dokumenti tal-ex Prim Ministru Wilson.
L-Università McMaster riedet li l-arkivju jinkludi karti minn żmien li Wilson qatta f’Nru 10 Downing Street.
Robin Butler kien beżan li jekk il-karti u dokumenti jinħarġu mill-pajjiż, kien jikkawża “inkwiet pubbliku” filwaqt li Andrew Turnbull, is-segretarju privat prinċipali ta ‘Thatcher, kien qal li ma kienx kuntent bil-”politika u moralità” ta’ tali idea. Għalkemm dawn id-dokumenti kienu formalment karti privati ta’ Lord Wilson, huma parti mill-istorja tal-pajjiż
L-Uffiċċju tal-Kabinett kien qal li ma kien hemm l-ebda ostaklu legali għall-bejgħ tad-dokumenti u l-karti iżda sa Lulju 1991 kienet instabet soluzzjoni alternattiva.
It-trustees tal-Arkivju Wilson kienu sabu donaturi anonimi, li jiffinanzjaw il-Librerija Bodleian f’Oxford biex jixtru l-karti u l-flus imorru għat-trust imwaqqaf għall-benefiċċju tal-familja Wilson. B’hekk id-dokumenti u l-karti jibqgħu fir-Renju Unit u f’post sigur.
