Il-prim ministru tad-Danimarka. Mette Frederiksen, sejħet elezzjoni bikrija biex, skont l-analisti, tieħu vantaġġ mill-każ ta’ Greenland wara t-theddid ta’ Donald Trump li jinvadi t-territorju Artiku. Il-prim ministru, li ilha fil-kariga mill-2019, ħabbret l-24 ta’ Marzu li ġej bħala d-data tal-elezzjoni.
L-elezzjoni propja hija meħtieġa mil-liġi Daniża li tissejjaħ sal-31 ta’ Ottubru, iżda l-iffissar ta’ data imressqa ‘il quddiem bi tmien xhur jidher li huwa tentattiv biex tirkeb fuq ir-ratings imtejba tal-istħarriġ wara li fl-elezzjonijiet lokali f’Novembru raw lis-Soċjalisti Demokratiċi tagħha jitilfu l-kontroll ta’ Kopenħagen għall-ewwel darba f’seklu.
L-istħarriġ tax-xahar li għadda wera li l-partit Soċjal Demokratiku deher li qed jirkupra sew, u dan attribwit parzjalment għall-immaniġġjar stupend tal-kriżi dwar Greenland. Frederiksen wiegħdet ukoll taxxa fuq il-ġid biex tiffinanzja l-iskejjel.
Wara li tat ħjiel ta’ avviż fuq il-midja soċjali, hija daħlet fil-parlament Daniż nhar il-Ħamis, titbissem u titgħannaq ma wħud mill-kollegi tagħha, inkluża l-politikanta tal-Greenlandja Aaja Chemnitz, qabel ma talbet lill-ispeaker il-ħin biex tagħmel stqarrija speċjali.
Quddiem parlament mimlija nies, Frederiksen qalet li se tkun elezzjoni “deċiżiva” għad-Danimarka u l-futur tal-Ewropa. Hija żvelat li kienet talbet lill-maestà tiegħu r-re biex isejjaħ elezzjoni u rrimarkat li jekk tkomplix tkun il-prim ministru tal-pajjiż jiddependi minn kemm hu b’saħħtu l-mandat li jingħata lis-Soċjal Demokratiċi.
Il-profil ta’ Frederiksen fix-xena internazzjonali żdied konsiderevolment matul l-aħħar xahrejn li fihom ġabret il-mexxejja Ewropej quddiem dak li seta’ kien theddida eżistenzjali għall-alleanza tan-NATO dwar il-Greenlandja.
Politiċi oħra taċ-ċentru-xellug u liberali kisbu spinta fl-oppożizzjoni tagħhom għal Trump, inkluż il-prim ministru Kanadiż, Mark Carney, li ffaċċja t-theddid tal-president tal-Istati Uniti li jannessa l-Kanada bħala l-51 stat Amerikan.
Il-pożizzjoni ta’ Frederiksen dwar il-Greenlandja tidher li ħadmet favur tagħha domestikament. Stħarriġ minn Megafon għal TV2 ix-xahar li għadda sab li l-appoġġ għas-Soċjal Demokratiċi żdied għal 22.7% tal-voti u 41 siġġu pproġettati, żieda minn 32 siġġu fil-bidu ta’ Diċembru.