Eluf kbar ta’ persuni ħarġu jipprotestaw fit-toroq tal-Messiku minħabba li skont huma hemm nuqqas ta’ infurzar u investigazzjonijiet hekk kif eluf kbar ta’ persuni jinsabu rraportati neqsin.
Qraba u ħbieb ta’ dawk irraportati neqsin ingħaqdu ma’ attivisti favur id-drittijiet tal-bniedem u ħarġu jipprotestaw fost l-oħrajn f’Mexico City, Guadalajara, Córdoba u bliet oħrajn. Huma kienu qegħdin jitolbu lill-President Claudia Sheinbaum biex tgħin u tinformza investigazzjonijiet biex jinstabu l-qraba tagħhom.
Skont rapporti fil-midja internazzjonali mill-2007 ‘l hawn hemm aktar minn 130,000 persuna rraportati neqsin u dan kollu seħħ hekk kif l-eks President Messikan Felipe Calderón kien qal li beda gwerra kontra d-droga.
F’Mexico City minħabba d-dimostrazzjoni li saret il-belt ġiet ipparalizzata bil-pulizija jkollhom jintervjenu biex tal-inqas it-traffiku jibqa’ miexi.
Il-Ġnus Magħquda ddeskriviet dak li qiegħed iseħħ fil-Messku bħala “traġedja umana” fejn uffiċjali ħeġġew lill-Gvern tal-pajjiż biex b’mod immedjat jgħin lill-familji jsibu lill-qraba tagħhom li wħud minnhom ilhom snin irraportati neqsin.