Fl-unika partita li kellna mill-Enemed Futsal League, Ta’ Xbiex Futsal kisbu s-sitt rebħa tal-istaġun meta għelbu lill-Universita’ ta’ Malta bl-iskor ta’ 8-2.
It-tim immexxi minn Daniel Brincat kellu partita ferm pożittiva speċjalment fit-tieni taqsima fejn xejjnu għalkollox l-isfida tal-Universitarji li kienu qed idabbru t-tielet telfa staġjonali.
Protagonista għal Ta’ Xbiex kien Karl Sciortino li skorja erba’ gowls filwaqt li Melvin Borg kien awtur ta’ doppjetta. Zvezdan Vukovic u Dylan Musu għaqqdu l-iskor għal Ta’ Xbiex.
L-Universita’ kienu fil-logħba biss sal-aħħar taqsima bil-gowls ta’ Aaron Montebello u Mohammed Elamari.
B’hekk Ta’ Xbiex telgħu issa fl-ewwel post tal-klassifika flimkien ma’ Luxol u Swieqi United.
KLASSIFIKA – Enemed Futsal League:
Swieqi Utd, Ta’ Xbiex, Luxol 18, l-Universita’ ta’ Malta 12, Żurrieq, St George’s, Marsaskala 9, Fgura Utd 6, Malta U19 3, Malta Veterans 0
