Il-kuntratt tal-coach tal-Ingilterra, Gareth Southgate, jintemm wara l-Euro 2024 iżda wara l-eliminazzjoni tat-Tazza tad-Dinja meta fil-kwarti-finali sfaw megħluba minn Franza bl-iskor ta’ 2-1, huwa stqarr li qed jikkunsidra l-futur tiegħu.
“Huwa kmieni wisq biex nieħu deċiżjoni dwar il-futur tiegħi hekk kif għadna kemm temmejna dan it-tournament. Irrid ftit żmien biex nirrifletti u nieħu deċiżjoni jekk inix se nkompli b’din ir-responsabbiltá.”
L-FA Ingliża temmen li Southgate għamel xogħol tajjeb ħafna biex l-Ingilterra kisbu r-rispett fl-ogħla livelli fix-xena internazzjonali.
Iżda fl-istess waqt li jirrikonoxxu li Southgate jista’ jiddeċiedi li jieħu direzzjoni oħra bid-direttur tekniku tal-FA Ingliża, John McDermott, se jkun inkarigat li jirrakkomanda lis-suċċessur tiegħu jekk Southgate jiddeċiedi li ma jkomplix fit-tmun.
Bħalissa qed jissemmew li Thomas Tuchel, Mauricio Pochettino, Brendan Rodgers u Steve Holland, kollha jistgħu jkunu fuq il-lista ta’ kandidati possibbli biex jieħdu post Southgate.
Il-Ġermaniż Tuchel rebaħ iċ-Champions League matul il-perjodu ta’ 18-il xahar tiegħu ma’ Chelsea u ilu bla xogħol minn meta tkeċċa mill-club ta’ Stamford Bridge aktar kmieni dan l-istaġun.
Pochettino mexxa lill-clubs tal-Premier League Tottenham u Southampton – kif ukoll Paris Saint-Germain – u qabel kien stqarr li jkun miftuħ li jkun il-coach tal-Ingilterra.
Rodgers għandu esperjenza kbira tal-football Britanniku hekk kif f’dawn l-aħħar 10 snin mexxa lil Swansea City, Liverpool, Celtic u Leicester City.
Holland ilu l-assistant manager ta’ Southgate mill-2016 u qatta’ aktar minn għaxar snin ma’ Chelsea qabel ir-rwol tiegħu mat-Three Lions.
