Żewġ Maltin u żewġ Taljani, it-Tlieta waranofsinhar ġew arrestati b’rabta ma’ allegat importazzjoni f’Malta ta’ ftit iktar minn tnax-il kilo droga suspettata kokaina, minn Sqallija. Il-valur tad-droga fis-suq hu stmat li jlaħħaq is-€600,000.
Wara informazzjoni li ġabret il-Pulizija, irriżulta li ż-żewġ Taljani – raġel ta’ 49 sena u mara ta’ 42 sena – kienu se jaslu Malta b’vettura bil-katamaran minn Sqallija. Wara li niżlu minn fuq ilkatamaran, il-Pulizija segwewhom sal-Gudja, fejn hemmhekk it-Taljani ltaqgħu maż-żewġt irġiel Maltin, it-tnejn ta’ 26 sena.
Kien hawn li l-Pulizija nterċettat il-vettura u l-erba’ persuni ġew arrestati. Dan wara li tfittxija li saret fil-karozza kkonfermat l-informazzjoni li kellha l-Pulizija u d-droga nstabet moħbija f’kompartament.
Bis-sejba kien infurmat il-Maġistrat Dr Franco Agius LL.D li ħatar inkjesta, filwaqt li l-erba’ persuni qegħdin jinżammu arrestati fil-lock-up tal-Pulizija, il-Floriana. Huma mistennija jitressqu l-Qorti llum, għall-ħabta tas-1:30 p.m., quddiem il-Maġistrat Dr Donatella Frendo Dimech LL.D.
