Erbat irġiel baqgħu jinżammu taħt arrest preventiv wara li lllum tressqu l-Qorti mixlija b’ħasil ta’ flus.
L-imputati huma Charlston Cassar, Redent Cassar, Jerome Azzopardi u Josef Majri. Huma ġew mixlija li l-Ġunju 2020 ppruvaw jaħslu bejniethom €21,000 fi ħwienet tal-logħob.
Il-Prosekuzzjoni spjegat fil-Qorti kif il-Pulizija bdiet tinvestiga l-każ aktar kmieni din is-sena wara li aġixxiet fuq tagħrif anonimu li rċeviet fl-istess żmien.
Intqal li s-suspett hu li l-akkużati kienu ġabu l-flus allegatament mit-traffikar tad-droga li dwarhom diġa’ ġew akkużati u ngħataw il-ħelsien mill-arrest.
L-imputati kienu mixlija wkoll li kisru l-kundizzjonijiet tal-libertà proviżorja u li saru reċedivi.
Id-Difiża talbu għall-ħelsien mill-arrest, bil-Prosekuzzjoni toġġezzjona minħabba biża’ ta’ intralċ ta’ provi u li għad fadal impjegati tal-ħwienet tal-logħob li għad iridu jixhdu f’dan il-każ.
Il-Qorti ċaħdet it-talba u ordnat li jibqgħu jinżammu taħt arrest preventiv fil-Faċilità Korrettiva ta’ Kordin.
Il-Prosekuzzjoni tmexxiet mill-Avukati Karl Muscat u Andrea Zammit mill-Uffiċċju tal-Avukat Ġenerali megħjuna mill-Ispetturi Tonjoe Farrugia u Robert Azzopardi.
