Il-politiku Amerikan Eric Swalwell irtira mit-tellieqa għal Gvernatur ta’ California wara pressjoni dejjem tikber fuq allegazzjonijiet ta’ mġiba sesswali ħażina.
Id-Demokratiku ġie akkużat minn erba’ nisa b’kondotta ħażina li tvarja minn fastidju sesswali sa stupru. Huwa ċaħad l-allegazzjonijiet u wiegħed li se jiddefendi lilu nnifsu b’“fatti”.
L-alleati ewlenin tiegħu kienu talbuh biex jirtira mit-tellieqa għall-gvernatur, li fiha kien ipproġettat bħala wieħed mill-favoriti fost il-kandidati Demokratiċi.
Il-pass li ħa Swalwell jiġi f’mument kruċjali, hekk kif ftit tal-ġimgħat oħra l-votanti jibdew jirċievu l-voti bil-posta qabel l-elezzjoni tat-2 ta’ Ġunju li se ssir biex jintgħażel is-suċċessur tal-Gvernatur Gavin Newsom.
F’kitba fuq X, Swalwell qal: “Qed nissospendi l-kampanja tiegħi għal Gvernatur. Lill-familja, ħbieb, membri tal-istaff u lis-segwaċi tiegħi ngħidilhom jiddispjaċini ħafna għall-iżbalji fil-ġudizzji li għamilt fil-passat.
“Se niġġieled l-akkużi serji u foloz li saru – iżda dik hija l-ġlieda tiegħi, mhux ta’ kampanja,” temm jgħid Swalwell.