Manchester United għadhom kif ħatru lill-coach ta’ Ajax Erik ten Hag bħala l-manager il-ġdid għat-tliet snin li ġejjin, liema kuntratt jista’ jiġi estiż b’sena.
L-Olandiż ta’ 52 sena se jieħu din ir-responsabbiltá fi tmiem l-istaġun. It-tim ta’ Machester United bħalissa jinsab taħt il-gwida tal-coach interim, Ralf Rangnick. Rangnick ħa post Ole Gunnar Solskjaer li tkeċċa f’Novembru li għadda.
Ten Hag se jsir il-ħames manager permanenti tal-United minn meta Sir Alex Ferguson irtira fl-2013.
“Hu unur kbir għalija li se mmexxi lil dan it-team ta’ Manchester United u ninsab eċċitat bl-isfidi li għandna quddiemna,” qal Ten Hag.
Bħalissa r-Red Devils jinsabu fis-sitt post fil-Premier League meta fadlilhom ħames logħbiet dan l-istaġun, tliet punti taħt Tottenham, li qed jokkupaw ir-raba’ post li jfisser post fiċ-Champions League.
Ajax jinsabu fil-quċċata tal-Eredivisie Olandiża, erba’ punti fuq PSV Eindhoven meta fadal ħames logħbiet, għalkemm huma tilfu kontra r-rivali tagħhom fil-finali tat-Tazza Olandiża fi tmiem il-ġimgħa li għadda.
Ten Hag, li ħa l-kariga ta’ head coach ta’ Ajax minn Diċembru 2017, wassalhom għad-double tal-kampjonat u t-tazza fl-2018-19 u l-2020-21.
