Esperjenza ta’ ġimagħtejn ġewwa Los Angeles tat perspettiva differenti lil Faye Galea, tfajla ta’ 14-il sena li għandha għal qalbha ħafna ż-żfin hip hop u street dance, kif ukoll ix-xenarju tad-drama. Permezz ta` scholarship parzjali li ngħata lilha waqt konvenzjoni taż-żfin, Faye kellha l-opportunitá li tqatta’ ġimgħatejn ġewwa Los Angeles bejn Lulju u Awwissu ta’ din is-sena.
Hemmhekk hi tgħallmet mingħand l-aqwa koreografi ġewwa Los Angeles bħal Caitlin Wheeler, Anthony Carr, Alexander Chung, Teya Wild, Gustavo Vargas, Linda Ayentes u Olivia Kula fost oħrajn. Esperjenza unika u li kienet ta` sodisfazzjoni kbir, kienet meta Faye kellha lezzjoni taż-żfin ma’ Stacy Walker li hija waħda mill-koreografi ta’ Michael Jackson.
F’temp ta’ 45 minuta Stacy għallmithom parti miż-żifna tat-tour ta` Michael Jackson tal-1995. Ma kienx kollox ward u żahar għal Faye Galea għax hekk kif iltaqgħet mal-kumplament taż-żeffiena, ħasset id-differenza fil-livell taż-żfin, peró dan taha l-kuraġġ u l-inizjattiva li tagħmel l-almu tagħha u tikber u tlaħħaq mal-livell taż-żeffiena barranin fi żmien ħmistax.
“Ħassejtni kburija li jiena Maltija u lil Malta faħħarnieha u ma kull ma min tkellimna, għalkemm vera ftit kienu dawk li jafu b`Malta. Permezz ta` dak li aħna bħala Maltin, qabbadnihom l-kurżitá dwar Malta u baqgħu mpressjonati bil-benefiċċji li għandna bħala ċittadini f`pajjiżna, bis-sbuħija tal-istorja ta` Malta u s-sbuħija tal-bliet u rħula Maltin u l-bajjiet sbieħ li għandna f’pajjiżna.
Peró, fl-istess ħin ma stajtx naħbi l-fatt li sfortunatament Malta għadha qiegħda tiżviluppa fuq l-importanza taż-żfin u l-arti. Huwa settur li Malta qiegħda temmen iktar fih u nemmen li għad jikber u jiġi stmat kif ħaqqu.” Faye kompliet tgħidilna kif l-kumplament taż-żeffiena kienu ġejjin minn stati differenti ġewwa l-Amerika, waqt li kien hemm żeffiena mill-Kanada kif ukoll mill-Ingliterra. L-etá kienet bejn l-10 u 23 sena u tkun xi tkun l-etá, l-ammont ta` prattika li jqattgħu jiżfnu dawn iż-żeffiena hija bejn erba’ u sitt darbiet fil-ġimgħa u jagħmlu bejn erba’ u sitt sigħat kull darba. L-Ingliterra wkoll jagħtu importanza lejn il-prattika taż-żfin u jipprattikaw ħames darbiet fil-ġimgħa, erba’ sigħat kull darba.
Faye qaltilna li, “Issa li tgħallimt kif l-aqwa żeffiena jikbru u jiskbu suċċess, hekk kif ġejt lura Malta ħadt il-parir li kelli xorti nieħu mill-koreografi li tgħallimt magħhom u se nkun qed nattendi lezzjonijiet taż-żfin differenti u se nkompli nipprattika ta` kuljum dak li għallmuni.” Waqt dan it-tour ta` The Hollywood Summer Tour, id-direttrici ta` dan l-ischolarship tathom l-opportunitá li jattendu seminars minn professjonisti li għandhom il-prattika taż-żfin u kellmuhom fuq nutrizzjoni tajba, saħħa mentali, immigrazzjoni u kif tibda kumpanija taż-żfin bis-saħħa tal-media soċjali. Apparti min hekk Faye spjegat kemm il-ġranet kienu mqassmin sbieħ, b’bilanċ tajjeb bejn lezzjonijiet taż-żfin ġewwa studios differenti bħall-Millennium, T Milly, Evolution, The Basement, Artistico and Mihran K Studios, kif ukoll bejn is-sightseeing u l-avventuri li kellhom bħala grupp ta’ żeffiena.
“Spiċċajna qisna familja u hekk kif għaddew il-ġranet u riedna nħallu lil xulxin, ilkoll bkejna, peró permezz tal-media soċjali wegħdna lil xulxin li nibqgħu fil-kuntatt u anke ‘l quddiem nixtiequ li nikkolaboraw fiż-żfin flimkien.”
Waqt is-seminar, Menina spjegatilhom kif il-fatt li ż-żeffiena li hemm fit-tour ġew magħżula għal-livell għoli taż-żfin tagħhom, qatt ma tista’ tgħid min miż-żeffiena li hemm fit-tour jispiċċa jkun aġent taż-żfin jew koreografu jew jiftaħ skola għal rasu fost opportunitajiet oħra u għalhekk kemm hu importanti li dejjem tibqa’ persuna umli u b`qalb tajba għax in-nies dejjem jibqgħu jiftakru kif ġielthom iħossuhom meta kienu miegħek.
Apparti l-lezzjonijiet intensivi taż-żfin, huma kellhom ukoll ġranet ta` rilassament fejn żaru postijiet bħal Manhattan beach, Santa Monica, Venice beach, The brand at the Americana ġewwa Glendale, Disneyland – California Adventure, Griffith Observatory, Beverly Hills kif ukoll il-Walk of Fame. Memorja ħelwa hija meta marru bħala udjenza ta` wieħed mill-programmi televiżivi tant popolari bl-isem ta` The Masked Singer.
Waqt dan it-tour Faye esperjenzat stil taż-żfin differenti bħall-Hip Hop, Jazz, Street Dance, Contemporary, Salsa, Jazz Funk u Heels. – żfin li qanqlilha kurżitajiet biex titgħallem u tkabbar it-talent tagħha taż-żfin.
Menina Fortunato li hija direttrici ta` dan it-tour għaddiet dan il-messaġġ fuq Faye. “Kien ta’ pjaċir assolut għalija li kelli lil Faye bħala parti minn The Hollywood Summer Tour. Hija l-unika żeffiena minn Malta li qatt intgħażlet biex tattendi għal dan it-Tour.
Hija kienet esposta għal diversi stili ta’ żfin fejn tħarrġet mal-aqwa koreografi ta’ Los Angeles, żifnet quddiem l-aqwa aġenti taż-żfin ta’ LA, attendiet recording ta’ show televiżiv, iffilmjat video mużikali, kellha photoshoots professjonali, u għamlet ħafna żjarat turistiċi mal-belt kollha. .
Issa għandha esperjenza aħjar tad-dinja taż-żfin professjonali f’Hollywood u se tkun tista’ tieħu l-għarfien tagħha lura lill-komunità taż-żfin f’Malta.” Għal Faye din hija esperjenza li tgħallmet ħafna minnha u li żġur li se tkun qed tgħinha tikber fil-karriera tagħha taż-żfin ġewwa pajjiżna li tant għandha għal qalbha.
