Beth Mead għenet lill-Ingilterra tibda bir-rebħ fil-Euro 2022 hekk kif għelbu lill-Awstrija bl-iskor ta’ 1-0 quddiem folla rekord għal logħba tal-Kampjonat Ewropew tan-Nisa f’Old Trafford.
Il-winger ta’ Arsenal niżżlet il-pass ta’ Fran Kirby fuq sidirha u b’għaqal qabbżet il-ballun minn fuq il-kollega tal-club, Manuela Zinsberger, wara biss 16-il minuta.
Kien hemm entużjażmu kbir mill-maġġoranza tat-68,871 spettatur preżenti hekk kif Mead daret lejhom b’passjoni b’dirgħajha fl-arja – għalkemm, kienu mġiegħla jistennew anzjużi peress li kien hemm verifika tal-VAR għal offside possibbli.
