L-Italja reġgħet ġiet miżmuma mill-Maċedonja, bl-iskor ta’ 1-1, liema partita kienet valida mir-round ta’ kwalifikazzjoni tal-Euro 2024 li ntlagħbet fi Skopje.
Kien Ciro Immobile (47) li fetaħ l-iskor għall-Azzurri fl-ewwel logħba tal-coach, Luciano Spalletti, li nħatar bħala s-suċċessur ta’ Roberto Mancini li ngħata l-kariga ta’ coach nazzjonali tal-Arabja Sawdija.
Iżda l-free-kick minn 20 metru bogħod ta’ Enis Bardhi kiseb id-draw għall-Maċedonja li kienu eliminaw lill-Istess Taljani mit-Tazza tad-Dinja 2022, fil-play-offs.
Fil-veritá t-Taljani kienu sfortunati meta Sandro Tonali laqat il-lasta filwaqt li Immobile falla ċans faċli bir-ras minn taħt il-lasta.
B’dan id-draw, l-Italja fallew żewġ punti importanti fit-tentattiv li jkomplu jisfidaw għall-kwalifikazzjoni għall-Euro 2024. Huma jinsabu fit-tielet post ta’ Grupp C, wara l-Ingilterra (13) u l-Ukrajna (7).
Bit-Taljani għandhom erba’ punti b’partita inqas, il-logħba ta’ nhar it-Tlieta li ġej kontra l-Ukrajna, f’San Siro, hija waħda kruċjali.
