Everton se jkunu sfurzati jbigħu jew lil Richarlison jew lil Dominic Calvert-Lewin dan is-sajf minħabba s-sitwazzjoni finanzjarja tagħhom.
Il-club tal-Premier League tilef £121m l-istaġun li għadda, u issa jridu jbiegħu player ewlieni tagħhom sabiex jibdew jibbilanċjaw il-kotba finanzjarji tagħhom.
Richarlison jew Calvert-Lewin se jinbiegħu dan is-sajf sabiex dan iseħħ, biż-żewġ players ikunu marbuta ma’ clubs differenti.
Manchester United qed jittamaw li jsaħħu l-għażliet tagħhom fl-attakk fis-suq tat-trasferimenti li jmiss, u Richarlison huwa maħsub li jkun fil-mira tar-Red Devils.
Intant, Arsenal għandhom ħarsithom fuq Calvert-Lewin, li kien ristrett bil-wirjiet tiegħu dan l-istaġun minħabba injuries, u għamel biss 10 dehriet fil-Premier League.
Minkejja li wieħed miż-żewġ attakkanti se jkun qed iħalli Goodison Park dan is-sajf, iż-żewġ players għad għandhom ħafna x’joffru biex jgħinu lil Everton iżommu posthom fil-Premier League għal staġun ieħor.
It-Toffees jinsabu tliet punti biss fuq iż-żona tar-relegazzjoni meta fadal 11-il logħba għal tmiem l-istaġun, hekk kif l-iskwadra mmexxija mill-manager Frank Lampard bħalissa tinsab fis-17-il post tal-klassifika.
