Fir-raba’ round tal-FA Cup, in-non-league club ta’ Maidstone United, irreġistra l-akbar sorpriża meta barra minn darhom għelbu lit-team miċ-Championship, Ipswich, bl-iskor ta’ 2-1
Il-goals tagħhom waslu minn Lamar Reynolds (43) u Sam Corne (66) filwaqt li Jeremy Sarmiento (56) kiseb id-draw momentarju għat-Tractor Boys.
Everton v Luton – Barra minn darhom, Luton għelbu lil Everton 2-1 bil-goal tar-rebħa jasal minn Cauley Woodrow (92).
Kienu Luton li fetħu l-iskor minn auto-goal ta’ Vitaliy Mykolenko (39) iżda Jack Harrison (55) kiseb id-draw għal Everton.
Leeds v Plymouth – Leeds United u Plymouth temmew fi draw ta’ 1-1.
Kien Jaidon Anthony (31) li fetaħ l-iskor għal Leeds iżda Adam Randell (73) għamel l-iskor indaqs għal Plymouth.
Leicester v Birmingham – Leicester kisbu rebħa komda ta’ 3-0 fuq Birmingham.
L-iskorers kienu Jamie Vardy (47), Yunus Akgun (72) u Dennis Praet (88).
Sheffield U. v Brighton – F’partita li offriet xejn inqas minn sitt goals, barra minn darhom Brighton għelbu lil Sheffield United bl-iskor ta’ 5-2. Il-protagonista tas-Seagulls kien Joao Pedro (29 pen, 52 pen, 67) bl-iskorers l-oħra jkunu Valentin Buonanotte (14) u Danny Welbeck (96).
Iż-żewġ goals ta’ Sheffield waslu minn Gustavo Hamer (44) u William Osula (45).
Bristol C. v Nottm F. – It-team miċ-Championship, Bristol City, ospita li dak tal-Premier League, Nottingham Forest u temmew fi draw ta’ mingħajr goals.
Chelsea v Aston Villa – Anke Chelsea u Aston Villa spiċċaw fi draw ta’ 0-0. Fl-ewwel taqsima, Chelsea setgħu għalqu l-partita fejn fallew bosta ċansijiet. Iżda wara l-mistrieħ, il-Villans kienu l-aħjar team u setgħu wkoll ħarġu rebbieħa.
Sheffield W. v Coventry – Partita bejn żewġ timijiet taċ-Championship, Sheffield Wednesday u Coventry spiċċaw fi draw ta’ 1-1.
Kien Victor Torp (45) li fetaħ l-iskor għal Coventry iżda Djeidi Gassama (84) salva r-riżultat għall-Owls.
Tottenham v Man City – Il-holders, Mancehster City, marru għand Tottenham u ħarġu rebbieħa bl-iskor ta’ 1-0, bl-uniku goal tal-partita jasal minn Nathan Ake, żewġ minuti mit-tmiem.
Interessanti huwa l-fatt li matul il-logħba kollha, Spurs indirizzaw xutt wieħed biss.
