Manchester City insew id-diżappunt tal-eliminazzjoni mill-kwarti tal- finali tal-UEFA Champions League kontra Real Madrid hekk kif b’goal ta’ Bernardo Silva lejn it-tmiem, għelbu lil Chelsea bl-iskor ta’ 1-0 biex issiġillaw post fil-finali tal-FA Cup.
L-istess Silva patta għall-iżball tal-penalty kruċjali fallut kontra l-istess Real Madrid.
Il-midfielder Portugiż (84) skorja l-goal rebbieħ mill-cross ta’ Kevin de Bruyne biex issa s-Citizens jimmiraw li jirbħu dan l-unur għat-tieni sena nfila.
Peró, min-naħa l-oħra Chelsea fallew bosta okkażjonijiet ta’ skor li kważi kollha waqgħu għand l-attakkant Nicolas Jackson.
Iżda huma wkoll jistgħu jħossuhom li kienu ‘vittmi’ ta’ inġustizzja meta fit-tieni taqsima pprotestaw bil-kbir għal penalty li ma ngħatawx meta l-free-kick ta’ Cole Palmer laqat id Jack Grealish li kien jifforma parti mill-barriera u minkejja li din l-azzjoni ġiet verifikata, il-VAR iddeċieda li kollox kien normali.
