Manchester United ibbukjaw posthom fil-ħames round tal-FA Cup meta f’darhom għelbu lit-team taċ-Championship, Reading, bl-iskor ta’ 3-1.
Minkejja li r-Red Devils kienu l-aħjar team, iż-żewġ timijiet daħlu jistrieħu fi draw ta’ mingħajr goals.
Iżda, f’temp ta’ erba’ minuti, Casemiro skorja doppjetta biex issetilja n-nervi ta’ sħabu. Huwa fetaħ l-iskor fl-54 minuta wara xogħol tajjeb ta’ Antony filwaqt li fit-58 minuta huwa kkonkluda mill-pass ta’ Fred.
Fil-65 minuta, Reading spiċċaw jilagħbu bi player inqas meta tkeċċa Andy Carroll għat-tieni karta safra wara foul fuq Casemiro.
Minuta wara, il-United aċċertaw mir-rebħa meta Fred irtokka l-ballun għal ġox-xibka.
Fit-72 minuta, Reading skorjaw il-goal ta’ konsolazzjoni minn Amadou Salif Mbengue.
