Tarxien R. ….1
Valletta …….5
L-attakkant żagħżugħ Emmanuel Promise Oluwatobi rnexxielu jiskorja doppjetta hekk kif Valletta qatgħu l-passaġġ għall-kwarti finali tal-Izibet FA Trophy b’rebħa komda ta’ 5-1 fuq it-team taċ-Challenge League, Tarxien Rainbows.
B’hekk il-Beltin żammew it-tamiet tagħhom ħajjin li jistgħu “jsalvaw” l-istaġun tagħhom bir- rebħ ta’ dan l-unur wara d-diżappunt tal-Kampjonat Premier meta jinsabu fil-Play Out Round.
Valletta kienu superjuri matul id-disgħin minuta fejn wara li ħadu vantaġġ ta’ żewġ goals fl-ewwel taqsima, goal ta’ Tarxien kmieni fit-tieni taqsima ħasadhom xi ftit iżda ma tantx damu biex reġgħu ħadu r-riedni f’idejhom u skorjaw tlieta oħra.
Ir-Rainbows kellhom ċans ta’ skor wara biss tliet minuti meta Attard għadda l-ballun lejn Abela iżda t-tentattiv għadda ftit barra. Valletta kienu pronti u rrispondew minuta wara, minn cross ta’ Pena Beltre, bil-konklużjoni ta’ Ivan Curjuric tiġi salvata minn Brandon Bartolo.
Fil-ħames minuta, Valletta fetħu l-iskor meta xutt ta’ Mario Fontanella ġie mblukkat mill-goalkeeper u mir-rebound, EMMANUEL PROMISE OLUWATOBI bir-ras tefa’ ġewwa.
Il-Beltin komplew jippressaw u fis-27 minuta Oluwatobi għadda l-ballun lejn Caio Prado b’Bartolo jimblukkalu f’corner biex mill-corner ta’ Curjuric, ESLIT SALA għeleb lill-goalkeeper ta’ Tarxien b’daqqa ta’ ras sabiħa.
Fl-34 minuta, Valletta reġgħu ttantaw xortihom minn daqqa ta’ ras ta’ Oluwatobi li għaddiet tħakkek mal-wieqfa wara cross ta’ Campos mil-lemin.
Sitt minuti wara l-mistrieħ Tarxien dehru li se jerġgħu jidħlu fil-logħba. SATURDAY NANAPERE seraq ballun minn wara l-linja ta’ nofs il-ground u avvanza qabel temm il-ġirja tiegħu b’xutt mill-isbaħ minn barra l-kaxxa li ma ta ebda ċans lil Cini.
Mas-siegħa logħob, Triston Caruana kien sfortunat meta b’xutt mill-bogħod ġie mċaħħad mill-mimduda.
Żewġ minuti wara, il-Beltin reġgħu ħadu vantaġġ ta’ żewġ goals meta Campos daħal tajjeb fil-kaxxa u għadda l-ballun lejn EMMANUEL PROMISE OLUWATOBI li għeleb lil Bartolo.
Fis-70 minuta, Valletta komplew ikabbru l-iskor meta Campos għadda l-ballun lejn IVAN CURJURIC li b’xutt angolat għeleb lil Bartolo bil-ballun jolqot il-lasta qabel jispiċċa ġewwa.
Sitt minuti mit-tmiem, is-sostitut KEVIN TULIMIERI għamilhom 5-1 b’xutt minn tarf il-kaxxa.
TARXIEN R.: 30-Brandon Edward Bartolo, 2-Carlos Conceicao Filho (22-Thiago Nonato Peixoto 72), 3-Darren Borg, 9-Daneel Abela, 10-Darren Falzon, 16-Brandon Muscat, 17-Brooke Farrugia (7-Wellington de Oliveira 46), 18-Saturday Nanapere, 19-Matthew Tabone, 21-Ryan Cauchi (11-Karl Cutajar 46), 39-Keith Attard – Coach: Stephen D’Amato
VALLETTA: 1-Yenz Cini, 4-Jean Borg (11-Michele Sansone 59’), 6-Triston Caruana, 14-Christian Gauci, 18-Enmy Pena Beltre, 19-Emmanuel Promise Oluwatobi, 20-Ivan Curjuric (92-Kevin Tulimieri 71), 66-Eslit Sala, 77-Caio Prado (17-Andrea Zammit 59), 89-Mario Fontanella (9-Haris Dilaver 78), 97-Lucas Campos (24-Rowen Muscat 72) – Coach: Danilo Doncic
REFEREE: Emanuel Grech
ASS. REFEREES: Roberto Vella, Paul Apap
RABA’ UFF: Slawomir Olucha
SKORERS: E. Oluwatobi 5, 62, E. Sala 27, I. Curjuric 70, K. Tulimieri 84 (V); S. Nanapere (TR)
AMMONITI: Ħadd
