“Fejn jidhrilna li huwa meħtieġ, anke jekk mhux kulħadd ikun kuntent bih, iva nagħmluh”

F’intervista mxandra qabel niċċelebraw il-festi tal-Milied, il-Kap tal-Oppożizzjoni, Bernard Grech, qal li f’Malta qegħdin ngħixu fi żmien surreali minħabba li fuq naħa qegħdin niċċelebraw il-festi u l-valuri tagħna mentri fil-Parlament hemm il-proposta tal-emenda tat-tqala. Huwa qal li l-poplu Malti jrid politika differenti u li l-PN kien dejjem magħruf bħala l-partit tad-djalogu u tal-ideat li jagħti widen lin-nies. Sostna  li, “aħna rridu politika ġenwina u onesta fejn inkunu ċari man-nies mhux kif qiegħed jagħmel Robert Abela meta jgħid li din l-emenda mhiex abort. Dak li jixtiequ n-nies, aħna nwettquh. Fl-istess nifs, imma, b’kontradizzjoni il-Kap tal-PN żied li, “però, aħna fejn jidhrilna li nistgħu nimxu ‘l quddiem u fejn jidhrilna li huwa meħtieġ, anke jekk mhux kulħadd ikun kuntent bih, iva nagħmluh”.

Hawnhekk huwa fakkar meta snin ilu Gvern Nazzjonalista kien iddeċieda li jaqta’ t-tipjip f’ċertu postijiet pubbliċi. Grech ammetta li, “dak iż-żmien ma kinitx popolari li taqta’ t-tipjip fil-postijiet pubbliċi fosthom fir-ristoranti imma aħna wettaqnih u dan il-pajjiż hekk għandu bżonn – li s-sewwa nwettquh”.

Huwa li saħaq li din l-emenda mhiex tat-tqala iżda tal-abort u reġa’ allega li l-Prim Ministru qiegħed iqarraq bin-nies u jwebbes rasu. Skont il-Kap tal-Oppożizzjoni, il-Gvern qiegħed jinjora s-soċjetà. Dan meta, huwa stess qal li l-emenda proposta mill-Gvern tipproteġi l-ħajja f’periklu tal-omm u lit-tobba li jikkurawha.

Bernard Grech iddikjara wkoll li , “fejn tidħol il-ħajja tal-mara, tirbaħ il-mara” imma xorta waħda talab li din l-emenda tkun irtirata. Illum din l-emenda tat-tqala se tidħol fit-tieni qari tagħha fil-Parlament u l-Kap tal-Oppożizzjoni qal li l-membri parlamentari tal-PN kollha se jivvotaw kontriha. “Il-PN se jibqa’ l-unika forza politika li temmen u taħdem favur il-ħajja. Bħala grupp parlamentari tal-PN se nkunu fil-parlament biex nagħmlu dmirna u se nivvotaw kontra din l-emenda għax din ma ssalvax il-ħajjiet kemm tal-omm, kif ukoll tat-tarbija”. Huwa qiegħed jisħaq li l-għajta tagħhom hija dik li jikkuraw u jgħinu lin-nisa u mhux li jidħol l-abort f’Malta b’liġi simili għal dik li saret fir-Renju Unit snin ilu.

“Minflok nikkompetu kontra xulxin dwar l-abort, bħala Gvern u Oppożizzjoni missna qegħdin naraw kif nistgħu ntejbu l-ħajja tan-nies, tal-familji u taż-żgħażagħ biex jibqgħu f’Malta,” spjega Grech. Il-Kap tal-PN fir-rigward tkellem dwar l-ispejjeż li qegħdin jiffaċċjaw il-familja Malti fejn ammetta li, “sfidi, dejjem kien hawn fil-pajjiż u kulħadd f’xi ħin jew ieħor ikollu sfidi però l-istatistika qiegħda turina li l-persuni li qegħdin isibuha diffiċli jlaħħqu mal-għoli tal-ħajja, dawk f’riskju ta’ faqar u anke dawk fil-faqar, l-ammont tagħhom qiegħed dejjem qiegħed jikber”.

Grech bħal dejjem sostna li f’Malta għandna bżonn ta’ politika onesta li tisma’ l-vuċi tal-poplu u għal darb’oħra attakka lill-Gvern dwar il-kontijiet tad-dawl u l-ilma. Huwa inċita li, “l-Gvern qiegħed jisraq lin-nies fil-kontijiet tad-dawl u l-ilma u din, jafha kulħadd. Qalu li hija anomalija u sal-lum dawn baqgħu jagħmlu l-istess. Aħna tajna l-aħħar ċans lill-Gvern u fil-kawża fil-Qorti se nkunu qegħdin niddefendu lin-nies li tawna l-informazzjoni u se nġibulkom il-flus lura”.