Il-klabb Tork Fenerbahçe ilbieraħ ħabbar li se jtemm ir-relazzjoni mal-kowċ Jose Mourinho.
Il-klabb qal fi stqarrija li kien temm il-kollaborazzjoni ma’ Mourinho, li kien il-maniġer tat-tim tagħhom mill-istaġun 2024-2025. Huma rringrazzjawh tal-kontribut tiegħu u awgurawlu suċċess fil-karriera futura tiegħu.
Intqal ukoll li din id-deċiżjoni waslet jumejn wara li Fenerbahçe ġew eliminati mill-playoffs tal-UEFA Champions League kontra Benfica.
Mourinho, il-kowċ Portugiż magħruf għall-karriera tiegħu mimlija trofej fl-Ewropa, kien laħaq irreġistra 37 rebħa, 14-il draw u 11-il telfa f’62 partita fil-kompetizzjonijiet kollha ma’ Fenerbahçe.