Minn Cristian Muscat
Kif bdiet l-imħabba tiegħek lejn it-triathlon?
Ta’ età żgħira bdejt nipprattika l-għawm u ftit wara bdejt nipprattika l-ġiri. Fl-istess waqt kont nuża ħafna r-rota biex imur l-iskola. Meta kelli seba’ snin skoprejt it- triathlon u tħajjart nipprovah. Is-sabiħ tat-triathlon hu li peressli tipprattika tliet dixxiplini tista’ mhux biss tikkompeti fi tlielaq ta’ triathlon imma wkoll fi tlielaq individwali.
X’suċċessi maġġuri ksibt fil-karriera tiegħek sa issa, għalkemm għadek ta’ età żgħira?
Waħda mill-aktar kisbiet personali kienet li wara ħafna preparamenti irnexxieli nidħol l-iSkola Nazzjonali tal-iSport (NSS). Irbaħt kompetizzjonijiet fit-triathlon bħall-Gozo Sprint Duathlon, Xterra kif ukoll irbaħt ħafna tlielaq tal-ġiri. Fl-2023 irbaħt l-MMBA xc National Championship tal-U12 u fl-2024 irbaħt kemm ir-Road Race Championship kif ukoll it-Time Trial Championship tal-U12. Din is-sena spiċċajt fit-tieni post tal-MMBA xco Points Series tal-U15.
Kif tqis il-livell tat-triathlon f’pajjiżna fil-preżent?
Għalkemm il-klabbs u l-federazzjoniet jagħmlu ħilithom kollha, kultant xorta waħda jsibu xi intoppi bħall-permessi. Niltaqgħu ukoll mal-problema li jkunu jridu jingħalqu t-toroq u għalhekk ikun hemm ħafna tgergir minn nies.
U dak tar-riżorsi fejn titħarrġu u jkollkom il-kompetizzjonijiet tagħkom?
Fil-ġimgħa nittrenja tliet darbiet l-iskola filwaqt li wara l-iskola nittrenja bejn ħames u sitt ijiem dixxiplini differenti u postijiet differenti.
Kif qed tħares lejn il-futur tiegħek fit-triathlon?
Fil-futur nixtieq li nkompli nitgħallem biex xi darba nkun nista’ nirrapreżenta lil Malta.
Għaddi messaġġ finali lil min jixtieq jagħmel karriera ta’ suċċess fit-triathlon.
Nixtieq ngħaddi messaġġ biex ma jaqtgħux qalbhom jipprovaw it-triathlon anke minn ta’ età żgħira għax huwa sport sabiħ ħafna li jista’ jiftaħlek bibien differenti!
