Stati Uniti ……….7
Malta …………..10
(3-1, 2-2, 1-3, 1-4)
It-tim nazzjonali tal-Under 16 tal-waterpolo, taħt il-gwida tal-coach, Anthony Farrugia, ma setax jitlob għal bidu aħjar f’dawn il-Kampjonati. Fl-ewwel parteċipazzjoni f’Kampjonati tad-Dinja tal-FINA, Malta irkuprat minn skor ta’ 5-3 fi tmiem it-tieni sessjoni biex rebħet il-partita 10-7.
Wara li żewġ goals veloċi fil-bidu tal-partita, Jayden Cutajar skorja penalty biex naqqas id-distakk. L-Amerikani kkonvertew sitwazzjoni ta’ man-up fil-bidu tat-tieni taqsima bi tweġiba immedjata minn Dean Bugeja. Malta tilfet sitwazzjoni ta’ man-up bl-Istati Uniti jiskorjaw il-ħames goal tagħhom. Lee Montebello Brownrigg skorja t-tielet goal ta’ Malta minn sitwazzjoni ta’ man-up fi tmiem is-sessjoni.
Anke jekk Malta kienet minn taħt b’2 goals fil-bidu tat-3 sessjoni, il-plejers kienu aktar kostanti u kunfidenti u wrew maturità u determinazzjoni kbira. Jayden Cutajar għal darb’oħra naqqas id-distakk iżda l-Istati Uniti kkonvertew sitwazzjoni oħra ta’ man-up. Cain Cutajar skorja l-goal li jmiss ta’ Malta minn sitwazzjoni simili, u Jayden Cassar ta lil Malta d-draw ta’ 6-6 fi tmiem is-sessjoni.
Ir-raba’ sessjoni kienet l-aktar parti eċċitanti tal-logħba b’Malta timxi fuq quddiem għall-ewwel darba permezz ta’ goal ta’ Jayden Cutajar. L-Istati Uniti kisbu d-draw minn sitwazzjoni oħra ta’ man-up biss biex Jayden Cutajar skorja r-4 goal tiegħu tal-partita fl-attakk li jmiss. Wara diversi sitwazzjonijiet ta’ man-up miż-żewġ timijiet, Jayden Cutajar reġa’ skorja biex żied il-vantaġġ ta’ Malta għal 7-9 meta kien fadal kważi tliet minuti min tmiem il-partita. Malta frustrat lill-avversarji tagħhom b’teamwork impekkabli fejn iddefendiet żewġ sitwazzjonijiet man-up. Meta fadal 17-il sekonda fuq l-arloġġ Elijah Schembri skorja l-10 goal ta’ Malta.
Il-Kampjonati jistgħu jarawhom billi tikklikkja l-link https://youtube.com/c/FINA1908 , filwaqt li l-punteġġ dirett huwa disponibbli wkoll fuq:
http://fina.microplustiming.com/FinaU16WPC2022/index_mobile.php.