Il-Kunsill Lokali tax-Xgħajra se jkun qed itella’ attività sajfija nhar is-Sibt, 26 ta’ Lulju. Din l-attività, li ġġib l-isem Elementi Sajfin, għandha l-għan li tgħaqqad lill-familji u l-komunità tax-Xgħajra għal attività fl-isfond tal-baħar Mediterranju.
Id-dettalji dwar din l-attività tħabbru mis-Segretarju Parlamentari għall-Gvern Lokali, Alison Zerafa Civelli u s-Sindku tax-Xgħajra, Neil Attard. Intqal kif din l-attività se tittella’ fiż-żona magħrufa Tal-Milord fi Triq Dawret ix-Xatt, ix-Xgħajra, dan bil-għan li l-baħar iservi ta’ sfond għal din l-attività.
Ġie spjegat li l-attività se tibda fis-6.00 p.m. sa nofsillejl, fejn se jkun hemm spettaklu mill-aħwa Fabrizio u Claudia Faniello, l-artist Xgħajri Giosue Agius, u l-grupp ta’ żfin mix-Xgħajra, Street Elements, l-artisti Liston u DJ Sheron, flimkien mal-grupp Project Band u l-vjolinist Fiorini. Apparti minn dan l-ispettaklu se jkun hemm ukoll ikel u xorb mill-grupp tal-Iscouts tax-Xgħajra stess.
Is-Segretarju Parlamentari Alison Zerafa Civelli qalet li din hi attività oħra minn sensiela ta’ attivitajiet li qed isibu l-appoġġ tal-Gvern ċentrali permezz tal-iskema maħruġa mid-Direttorat tal-Gvern Lokali. Spjegat kif qed tingħata attenzjoni wkoll lejn il-kwalità tal-attivitajiet li jittellgħu.
“L-għan ewlieni ta’ dawn l-attivitajiet madwar l-irħula u l-ibliet Maltin u Għawdxin huma sabiex il-familji u l-komunitajiet ikollhom mezz ieħor ta’ divertiment matul l-istaġuni kollha tas-sena. Attivitajiet bħal dawn se jkomplu jsibu l-appoġġ finanzjarju u anke loġistiku tal-Gvern ċentrali, hekk kif ikomplu jgħollu l-kwalità tal-ħajja taċ-ċittadini tagħna,” temmet tgħid is-Segretarju Parlamentari Zerafa Civelli.
Min-naħa tiegħu s-Sindku tax-Xgħajra, Neil Attard, sostna kif din l-attività setgħet tittella’ permezz tal-appoġġ tal-Gvern lill-Kunsilli Lokali u l-komunitajiet sabiex jittellgħu attivitajiet bħal din. Huwa ħeġġeġ lir-residenti tax-Xgħajra sabiex ikunu parteċipi f’din l-attività sabiex dawk kollha li se jattendu, anke minn barra r-raħal, ikollhom esperjenza mill-isbaħ ta’ din il-lokalità.