Mill-inqas erba’ persuni sfaw maqtulin hekk kif persuna bdiet tispara bl-addoċċ f’restornat fl-Istati Uniti.
Il-każ seħħ waqt festin ta’ għeluq snin ta’ tifel li kien qed isir f’ristorant ilbieraħ filgħaxija fi Stockton f’Kalifornja fl-Istati Uniti.
Il-Pulizija qalu li fost il-vittmi hemm anke tfal, filwaqt li l-istess pulizija ma setgħux jikkonfermaw il-kundizzjoni ta’ dawk li ddaħħlu l-Isptar għal kura.
Uffiċjal għoli tal-Pulizija waqt li kien qiegħed jitkellem mal-midja qal li l-attakk seħħ ftit qabel is-6.00pm (ħin lokali) u appella lill-pubbliku biex kull min għandu filmati, ritratti tal-każ jgħaddihom mill-ewwel lill-Pulizija biex isaħħu l-investigazzjoni tagħhom.
L-Uffiċjal qal ukoll li l-investigazzjonijiet għadhom fil-bidu tagħhom u kull possibilità qiegħda tiġi investigata. Iżda qal ukoll li l-ewwel indikazzjonijiet huma li minn wettaq dan kellu mira li jisparaw fuq persuni li kienu qegħdin jattendu dan il-festin.
