L-2025 kienet sena impenjattiva iżda deċiżiva għall-General Workers’ Union (GWU). Fuq kollox, ikkonfermat b’mod ċar ħaġa importanti: meta l-ħaddiema jiffaċċjaw pressjoni, id-djalogu soċjali b’saħħtu u strutturat flimkien ma’ negozjar kollettiv effettiv iwasslu għal riżultati konkreti.
Dan iddikjarah is-Segretarju Ġenerali tal-General Workers Union (GWU), Josef Bugeja. Hu kompla jgħid li “tul is-sena, il-GWU kkonkludiet firxa wiesgħa ta’ Ftehim Kollettivi kemm fis-settur pubbliku kif ukoll f’dak privat, li wasslu għal titjib fil-pagi, kundizzjonijiet aħjar tax-xogħol u sigurtà akbar fl-impjiegi. Fost l-oħrajn, ġew konklużi Ftehim importanti għall-Amministrazzjoni Pubblika, is-Servizzi Korrettivi, il-Forzi Armati ta’ Malta, kif ukoll ma’ diversi entitajiet u kumpaniji fosthom EasyJet, Medavia, MaltaPost, Gasco, il-Water Services Corporation, GO, Project Green, Resource Support & Services Ltd (RSSL), il-Borża ta’ Malta u diversi aġenziji ta’ reklutaġġ u tal-impjiegi.”
“Barra minn hekk, ġew konklużi Ftehim Settorjali li jkopru gradi amministrattivi, tekniċi, snajja’ u superviżorji, kif ukoll MOU mal-Malta Delivery Fleet Operators Association. Madankollu s-sena ma kinitx nieqsa mill-isfidi. Il-GWU kellha tiffaċċja t-theddida ta’ sensji fi tliet postijiet tax-xogħol differenti. Permezz ta’ mobilizzazzjoni, perseveranza u pressjoni b’saħħitha fin-negozjar kollettiv, il-GWU irnexxielha tiżgura pakketti ta’ kumpens adegwati għal mijiet ta’ ħaddiema – Maltin u barranin – affettwati mill-għeluq ta’ dawn il-postijiet tax-xogħol” sostna Josef Buġeja.
Is-Segretarju Ġenerali tal-GWU tenna li “fuq livell nazzjonali, il-GWU kellha rwol attiv fit-tfassil ta’ politiki dwar leave speċjali, xogħol fuq pjattaformi diġitali, paga ġusta, paga ugwali għal xogħol ta’ valur ugwali, aġenziji ta’ reklutaġġ u tal-impjiegi, protezzjoni kontra l-għoli tal-ħajja, produttività, migrazzjoni, mobilità u protezzjoni soċjali. Filwqaqt li qed tkompli tgħin fl-implimentazzjoni ta’ dawn il-miżuri. B’riżultat ta’ dan, madwar 14,000 ħaddiema mal-kuntrattur, fosthom carers, gwardjani tas-sigurtà u cleaners, issa għandhom paga ugwali għal dik tal-ħaddiema fis-settur pubbliku li jagħmlu l-istess xogħol. Il-GWU ppreżentat ukoll proposti dettaljati għall-Baġit ta’ Malta għall-2026 u għall-Viżjoni Malta 2050, li jirriflettu kontribut estensiv tal-politika. Fl-istess waqt, l-Unjin saħħet l-inizjattivi tagħha favur l-inklużjoni u espandiet b’mod sinifikanti l-ħidma tagħha mal-ħaddiema barranin.”
Żied jgħid li “fuq livell Ewropew u internazzjonali, il-GWU, flimkien mal-European Trade Union Confederation (ETUC), ħadet sehem attiv fid-difensiva tad-Direttiva dwar il-Paga Minima Adegwata quddiem il-Qorti tal-Unjoni Ewropea, li fl-aħħar irrifjutat l-argumenti ewlenin tar-rikorrenti. Il-GWU kkontribwiet ukoll fid-diskussjonijiet tal-Kumitat Ekonomiku u Soċjali Ewropew (EESC), il-Konfederazzjoni Ewropea tat-Trade Unions (ETUC) u l-Konferenza Internazzjonali tax-Xogħol (ILO). L-2025 kienet ukoll sena ta’ tiġdid. L-Unjin investiet fl-istrutturi interni tagħha, indirizzat forom ġodda ta’ xogħol u saħħet ir-rappreżentanza tagħha f’postijiet tax-xogħol ġodda . Fuq livell internazzjonali, il-GWU kompliet issaħħaħ il-vuċi ta’ Malta f’dibattiti dwar il-pagi minimi, it-trasparenza fil-pagi, ix-xogħol fuq pjattaformi, il-protezzjoni soċjali u l-futur tax-xogħol.”
Iddikjara li “ma kinitx sena faċli — iżda kienet sena li fiha l-General Workers’ Union wriet b’mod ċar ir-relevanza, il-kredibbiltà u r-responsabbiltà tagħha. L-2026 se tkun sena kruċjali għad-dinja tax-xogħol u għas-soċjetà inġenerali. Hekk kif l-ekonomija f’pajjiżna mistennija tkompli tikber, l-innovazzjoni teknoloġika — b’mod partikolari l-intelliġenza artifiċjali — se tkompli tbiddel in-natura tal-impjiegi. Il-prova vera se tkun jekk dawn il-bidliet hux se jibbenefikaw in-nies minnhom u mhux biss il-profitti. L-AI u d-diġitalizzazzjoni jridu jiġu implimentati b’approċċ iċċentrat fuq il-bniedem, biex itejbu l-ħiliet, jipproteġu l-impjiegi u jtejbu l-kundizzjonijiet tax-xogħol, mhux biex jissostitwixxu jew iżidu l-piż fuq il-ħaddiema. Fl-istess ħin, l-inċertezzi globali jibqgħu ta’ tħassib kbir. Il-kunflitt kontinwu fl-Ukrajna, il-kriżi umanitarja u l-oppressjoni sistemika li qed jiffaċċja l-poplu Palestinjan, kif ukoll iż-żieda fit-tensjonijiet kummerċjali, fit-tariffi u fit-tilwimiet ekonomiċi bejn potenzi ewlenin, kollha għandhom effetti diretti fuq is-swieq tax-xogħol, il-prezzijiet u s-sigurtà tal-ħaddiema madwar id-dinja.”
Kompla jgħid li “fuq livell nazzjonali, id-dibattiti fl-2026 huma mistennija jiffokaw b’mod qawwi fuq id-drittijiet tal-ħaddiema, il-produttività, il-protezzjoni soċjali u d-drittijiet ċivili. Il-pressjonijiet fuq il-pagi se jkomplu, iżda s-soluzzjonijiet ma jistgħux ikunu bbażati fuq sigħat itwal jew fuq tnaqqis fil-protezzjoni. Is-suċċess jirrikjedi negozjar kollettiv modern, djalogu soċjali b’saħħtu, investiment fil-ħiliet u salvagwardji soċjali robusti biex jiġi żgurat li l-ħaddiema jgawdu b’mod ġust mill-qligħ ekonomiku u teknoloġiku. Il-GWU se tkompli taħdem b’mod intens fuq l-implimentazzjoni tal-Viżjoni Malta 2050, il-politika nazzjonali dwar in-nuqqas ta’ ħiliet, it-trasparenza fil-pagi, il-paga minima adegwata, l-għoli tal-ħajja u l-aċċess għal akkomodazzjoni affordabbli. L-għażliet li qed jittieħdu issa se jkollhom effetti fit-tul, u l-GWU trid tibqa’ parteċipant attiv u responsabbli f’dawn id-diskussjonijiet.”
Enfasizza li “l-ħaddiema f’Malta — speċjalment dawk f’impjiegi mhux standard, li jaħdmu għal rashom jew fuq pjattaformi diġitali — se jkollhom bżonn trattament ġust, sigurtà u parteċipazzjoni sinifikanti fit-tfassil tal-futur tax-xogħol. Id-djalogu soċjali se jkun ċentrali: pajjiżi li jinkludu lill-ħaddiema fid-deċiżjonijiet ekonomiċi, teknoloġiċi u soċjali se jibqgħu reżiljenti u kompetittivi, filwaqt li dawk li jimmarġinalizzaw lill-ħaddiema jiffaċċjaw instabbiltà u inugwaljanza. It-tbassir tagħna hu ċar: fl-2026, id-djalogu soċjali mhux se jkun għażla — se jkun essenzjali.”