Studenta nqatlet b’daqqiet ta’ sikkina barra l-kampus tal-università fejn kienet tattendi talli allegatament irrifjutat proposta ta’ żwieġ. Naira Ashraf kienet attakkata minn raġel hekk kif niżlet minn xarabank barra l-Università ta’ Mansoura fiċ-ċentru tal-Eġittu ftit tal-jiem ilu filgħodu.
L-attakk seħħ quddiem in-nies li mminnufih ippruvaw jifirdu lir-raġel mit-tfajla studenta. Dan id-delitt inġibed ukoll minn kameras tas-sigurtà.
Naira Ashraf ġiet iddikjarata mejta fuq il-post kaġun ta’ diversi ġrieħi serji li ġarrbet f’għonqa, irrapportat il-midja lokali.
Dan l-omiċidju ħasad lill-pajjiż kollu tant li immaġini u filmati tal-attakk malajr bdew jiġu ċċirkolati onlajn.
Wara dan id-delitt, il-pulizija nediet investigazzjoni u arrestat student ieħor fl-università.
Is-suspettat, Mohamed Adel mill-Egpytian Independent huwa mifhum li huwa student tat-tielet sena fl-istess skola ta’ Naira.
Fi stqarrija, il-pulizija qalet li l-investigaturi tkellmu ma’ 20 xhud, inkluża l-familja ta’ Naira li allegatament qalu lill-uffiċjali li kienet suġġetta għal ‘fastidju kostanti’ minn raġel wara t-tkissir tar-relazzjoni tagħhom u ċ-ċaħda tagħha tal-proposta taż-żwieġ tiegħu.
Huwa mifhum li xahrejn ilu rrappurtaw il-kwistjoni u t-tħassib tagħhom lill-pulizija.
L-awtoritajiet Eġizzjani ġew ikkritikati b’mod konsistenti minn gruppi tad-drittijiet tal-bniedem għan-nuqqas tagħhom li jipproteġu lin-nisa u l-bniet.
Fl-aħħar rapport tagħha dwar il-pajjiż, Amnesty International qalet li l-awtoritajiet Eġizzjani kienu qed jonqsu ‘li jipprevjenu u jinvestigaw vjolenza mifruxa fuq in-nisa u l-bniet’.
