Sliema Wanderers ….0
Floriana ……………….1
F’partita mistennija, Floriana rebħu l-Old Firm Derby meta għelbu lil Sliema Wanderers bl-iskor ta’ 2-0, biż-żewġ goals jaslu fit-tieni taqsima.
Kienet wirja mill-aqwa għall-Greens fejn l-iskor seta’ kien akbar billi fallew penalty fl-ewwel taqsima.
Minkejja din it-telfa, Sliema xorta jippossjiedu team li jista’ jibqa’ jisfida għal post fil-kompetizzjonjiet Ewropej.
Kienu l-Wanderers li ħarġu fuq l-offenisva u wara biss erba’ minuti Myles Beerman minn throw-in għadda lejn Geoffrey Achempong li kompla lejn Vito Plut bit-tentattiv tiegħu jintemm ftit għoli.
Floriana wieġbu għall-ewwel darba fil-25 minuta meta minn azzjoni ta’ corner, Adam Magri Overend venven xutt mill-viċin, bil-ballun jaħbat max-xibka minn barra biex ta l-illużjoni tal-goal.
Fit-32 minuta, il-Wanderers għamlu reazzjoni iżda għal darb’oħra x-xutt ta’ Plut għadda ftit barra.
Mill-azzjoni li segwiet, minuta biss wara, Floriana rebħu penalty meta Denis Kouao waqqa’ lil Matheus Nogureira fil-kaxxa.
Iżda mill-11-il metru, Jose Ulises Arias ra t-tentattiv tiegħu jaħbat ma’ sieq il-lasta bid-difiża tal-Wanderers tkun pronta u tbiegħed il-periklu f’corner.
Fit-tieni taqsima, ir-ritmu naqas xi ftit bil-logħob ikun konċentrat f’nofs il-ground … sakemm, fit-72 minuta, Floriana fetħu l-iskor, meta Kemar Reid bidel il-ballun ma’ Kyrian Nwoko u b’xutt mill-baxx mill-viċin ma żbaljax.
Wara dan il-goal, il-Furjaniżi komplew jiddominaw u erba’ minuti biss wara huma ssiġillaw ir-rebħa meta minn azzjoni ta’ corner, OWEN SPITERI ġie minn wara u b’daqqa ta’ ras b’saħħitha għeleb għal kollox lill-goalkeeper Sliema, Rashed Al Tumi.
Il-Wanderers ipprovaw jagħmlu xi forma ta’ reazzjoni iżda Floriana kienu kompatti biex għalqu l-ispazji neċċessarji bil-konsegwenza li sas-suffara finali l-iskor baqa’ l-istess.
